Minevä puulpäävä oll’ Mõnistõ rahvamajan Kuudsil hulga juttu raamatist ja kultuuriluust: tähistedi timahavast raamaduaastat ja toda, et Mehkamaal om olnu 155 aastakka võimalust raamadukogon kävvü. Pidopäävä külälises oll’ kutsut Mehkamaalt peri kultuuriluulanõ Kõivupuu Marju, kiä ildaaigu tähüst’ umma 65. sünnüpäivä.

Pidopäävä tähüstämises oll’ saali vällä säet kolm väikut näütüst. Üte stendi pääle olli vällä kirotõdu kolmõ Mehkamaa raamadukogo – Kuudsi, Saru ja Mõnistõ tegünemiseao ja üles loedu, kiä omma olnu läbi ao raamadukogohoitja. Kündlidega valgustõdu lavva pääle olli Mõnistõ muusõumi kogodõst tuudu raamadu, miä omma Mehkamaa inemiisiga köüdetü vai määnestki muudu esierälidse. Kolmanda näütüseriioli pääle olli vällä pantu Kõivupuu Marju kirotõdu vai kokko säedü raamadu.

Päävä tegemise olli kah kolmõn jaon. Kõgõpäält kõnõl’ kõrraldaja Roobi Katrin tsipakõsõ pidopääväst ja and’ tenolilli Kõivumäe Helgile, kiä sai timahava 80aastadsõs ja oll’ Kuudsi raamadukogo juhataja 2023. aastagani, kokko 60 aastakka. Ku raamadukogo kinni panti ja raamadu koolilõ üle anti, jakas’ Helgi raamatidõ lainutamist priitahtligun kõrran kõrra nädälin. Tuud tege tä täämbädse pääväni.

Lilli sai ka timahava 70. sünnüpäivä pidänü Veberi Liilia, kiä oll’ inne raamadukogoreformi 2023. aastagal 32 aastakka Mõnistõn raamadukogohoitja.

Edesi pidi Mõnistõ muusõumi kogohoitja Jalandi Liispet lühkü loengu Mehkamaa raamadukogo aoluust ja kõnõl’ muusõumi raamadunäütüsest.

Päävä pääküläline Kõivupuu Marju kõnõl’ rahvakallendrist ja rahvakombist, ristipuiõst ja tuust, midä vällämaalasõ Eestin kõgõ inämb hindasõ. Timä tähelepandmisõ perrä ommaki nuu mi alalõpüsünü kombõ ja puhas luudus. Kõivupuu tõi vällä, et tähtsä omma viil mi muistidsõ mõistmisõ, miä nakkasõ joba häömä.

Rahmani Jan

Pidoõdagu avvuküläline, Mehkamaalt peri kultuuriluulanõ Kõivupuu Marju. Rahmani Jani pilt

Näütüselaud Mõnistõ muusõumi kogost peri raamatist, miä köüdedü Mehkamaalt peri inemiisiga. Rahmani Jani pilt