Kahru-hirm tõi rassõ haigusõ
Käve Urvastõ koolin edimädsen klassin,
oll' viimäne koolipäiv inne talvist vaheaigu. Kodotulõk'
jäi veidü ilda pääle, nakas' pümmes minemä.
Koolitii läts' läbi mõtsasaarõ. Tulli
sis mõtsa vaihõlt ja äkki näi, et kahr istus tii veeren.
Lätsi sis veidükese tagasi, et kahr saassi är minnä. A
ku vahtsõst edesi lätsi, sis oll' kahr iks samatsõ
kotussõ pääl ja nii mitu kõrda. Es jää muud üle, ku
sumpsi sügävän lumõn tsõõriga ümbre mõtsa. Ku kodu sai,
olli üleni higist likõ. Päält tuud jäi rassõdõ haigõs.
Tull' tävvüpõlõndik ja veidükese ao peräst jäie viil
ajukelme põlõndikku.
Edimäne asi, midä haigusõ aost mäledä,
om tuu, et tohtrõ Lattik kõdit' minnu talla alt.
Mul oll' kõdi. Sis ütel' tohtrõ
imäle, et seo lats' koolõ-i, saa terves. Mõtli, et kül
arst' om rummal'. Kõik' inemise jo pelgäse kõti. A
tohtrõl oll' õigus. Tervüs nakas'
tagasi tulõma. Tahtsõ sängüst
aknõ manu suusatamisõ võistlusi kaema minnä. A saa õs
tõisi abilda – tallaaludsõ olli nigu tsõõrigus lännü.
Näi iks är, kuis kuulsa suusataja Neeme Harri korgõst
mäenõlvast suusõga üles läts'. Mi es saa suvõl ronidõngi
säält üles!
A ku sis päält mitmõ kuu kuuli sai, sis
näi mõtsa vaihõl, et tuu tiiperve veeren olnu kahr oll'
hoobis suur' kuiunu kadajapuhm.
Vot, midä hirm tekk'!
Kruusamäe (Panni) Maimu
Tossu Tilda
pajatas
Meelehää
Kats' piimäkombinaadi näiokõist
patsiirsõva üts'kõrd uulidsa pääl. Sääl nakas' näile
külge lüümä üts' miis' – tüükaaslanõ. Noorilõ
naistõrahvilõ tuu miis' es miildü, selle et tä kitt'
hinnest ülearvu. Nüüd naas' kah laiama, ku pall'o täl
rahha om. Ummi sõnnu kinnütüses ost' «pruutõlõ» ijätüst
ja es'ki lille. Näiokõisil oll' miist viländ ja nä
tahtsõ timäst ammu vallalõ saia. Kuimuudu sis? Vanast
oll' Võrol Jüri, tuukõrd Lenini, uulidsa veeren
majapidämis-kraami puut'. Üts' näio ütel' mehele
mesimakõ helüga, et miis' om näid niipall'o avvustanu ja
näide pääle rahha kulutanu, et nää tahas nüüd mehele kah
veidü meelehääd tetä. Uutku kavaliir' näid ussõ takan,
nä käävä ruttu poodin är... Miis' jäigi ussõ kõrvalõ
truult saisma. Naasõ lätsi puuti ja palssi, et näid
takastussõst vällä lastas. Kaupmiis' tekk'ki nii.
Tõõsõl pääväl tüü man vah-tõ miis'
tütrikkõ vihadsõlt. Tull' vällä, et tä oll' välän
meelehääd uutnu üle poolõ tunni.
Lindasõ nuu, kiä linnada mõistva
Ku Lepikson maavanõmbas sai, nakas' tä
umma kaadripoliitikat ajama. Lepikson märk'se, et
kinkagi pidänü tüült valla laskma. Peräkõrd võtt' vasta
otsussõ, et kõgõpäält lindasõ nuu, kiä linnada mõistva.
Ammõtist saiva priis Kikas ja Kaarna!
Portfell'
Oll' vast' müüdälännü aastasaa
viiekümnes aasta, väega vaenõ aig, kos asjo osta es olõ
ja uhkust aia es saa. A nuurus mülläs' iks ummamuudu:
pois'kõsõ tüksevä kaklõma ja lats'kõsõ juusksõva kipõstõ
oppajilõ är kaibama.
Edimädsen klassin oll' üts' Kargu Ülo,
kedä tõsõ pois'kõsõ rahulõ es jätä, kõgõ tahtsõva tälle
tappa anda. Tä oll' iks esi kah väega kergäts', kitse
kõgõ hinnäst ja ummi asju.
Üts'päiv tull' tä kuuli vana
vas'kanahast portfelliga ja selet' poiúkõisilõ: «Kaegõ,
poisi, seo portfell' om nii kõvast nahast, et om vasta
pidänü kolm kooliaigu. Kõgõ inne käve seoga koolin mu
esä, sõs käve imä ja nüüd käü ma kah!»
Saksa Tõnu virut' tuu jutu pääle vaesõlõ
Ülolõ õkva vasta kõrvu. Tõsõ pois'kõsõ tüksevä ka
rus'kidõga kallalõ ja ütlivä: «Sullõ om jäl tappa vaia,
sa vad'epoig, jäl võlsit! Kuis saiva su esä ja imä üte
portfelliga koolin kävvü, ku nä tuudaigu üts'tõist
tunnõki õs?!»
Mudsu Mari
Tii-tii,
tialanõ
Ruitlasõ Olavi,
takast-toukaja
Rahvusligu
õurovis'ooniluu vällävalimisõl puul'päävä 7. veebruaril
astussõ üles kümme laulu, noidõ seen ka Ilvesse Aapo
kirotõduidõ sõnnoga «Tii», miä tii-i joht häpü keelele,
minkan tä kirotõt om.
Mõtlõ parhilla
jälehüsega, et ku õurovis'oonil, miä sisu poolõst om
häste rahastõt tisse ja tuss'e karnõvaal', lauldassi
«tümpsnä» taustal määnestki võrokiilset kiima-luku ja
takan hüplesi puul'pall'a näidsigu, nakkasi süämel
hallõ.
Kiilt, mingas
mu vanaimä õdagu lehmä kodo hõigas', ei tohissi
õuruupaligu ja Ameeriga-muudu «sukmaiassi» (umbõs:
’laku
perst’) kultuuriruumiga ütte sulata.
Minevädse aasta
Eesti õurolugu «eitiins kamin bäkk» (’katsõkümnendä
tulõva tagasi’) sai õurovis'oonil «hallõ» kaotusõ. Saman
olõ ma esi kimmäs, ja Ravva Mihkli ütel' as'a ka vällä,
et tõõnäolidsõlt oll' tegemist terve õurovis'ooni aoluu
kõgõ parõmba luuga. Mille mi sõs es võida?
Võidimigi!
Vaihõpääl om niimuudu, et kõgõ suurõmb kaotus elon om
samal aol kõgõ suurõmbas võidus. Minevädse aasta tulõmus
näüdäs', et huul'malda konkursil valitsõvist
eelistüisist, oll' laulja Epligu Vaikol ja kitramängjä
Pehu Jaanil ni tõisil pändi miihil tahtminõ muusigat
tetä, asi, miä sääl konkursil om joba ammuilmä är
unõhtõt.
«Tii» pakk
samma: kas suurt avvu võidu näol vai sõs säänestsamma
avvu ja hindä väärtüse alalõjätmist kaotusõ kõrral.
«Tii» kõnõlas
lihtsist as'ost, minkast suurõmb osa õuruuplaisist
inämb sukugi arvo ei saa. Näütüses sõna kikkalaul
tulõtas näile vas't kõgõ rohkõmb Knorri kanapuljongi
reklaami miilde ja teksti: «sääl kon silmäpiir / ummi
varbit näe / oroviir', mõtsatii, üle jõõ, üle mäe /»
pääle nakkasõ Õuruupa suurõmbin liinun inemise
tõõnäolidsõlt hulgakaupa hinnäst är tapma! Selle, et ega
sääl Õuruupan joht olõ-i silmäpiiri, oroviirt, jõkõ ja
mäke ütenkuun. Mis sa, ullikõnõ, ummi mõskmalda
varbidõga ütsindä õks pääle nakkat!
Sjookõrd vali
õurolaulu rahvas! Sjoo ei olõ niimuudu, nigu ResPublica
valiminõ, et annat ütele uma helükese ja sõs kõgõ
tugõvamb «respublikaan'» võtt kõik' helü hindäle, käänd
pää viltu kaala otsa ja nakkas valitsõma. Õurolaulu
valimisõ piässi õks ausamba olõma.
Tahassigi nätä,
et võro, seto ja kõik' sjoo veeremaa rahvas üten, nigu
üts' miis', annassi 7. veebruaril helü uma as'a puult.
Ja et ei olõssi määnestki ikmist, et telehvooniarvõ ja
nii edesi! Helistäti lavvatelehvonnõ päält, sõs egä
mobiili päält erälde ja kõgõ lõpun roniti
telehvonnipostõ otsa, panõti juht'mõ traatõ külge ja
mugu valiti ja valiti.
Ku mi,
võrokõsõ, joba Õuruupan olõmi, sis ei olõ tuud
õuroopasitta siiä oro viirde inämp vaiagi! Vai kui? |