Seol nimel om Eestin 226 kandjat. Vanan kiräviien kirotõdi Pruli, ka taal nimekujul om seoilmaaigu 19 kandjat. Nime tegünemise kotussit om umbõs 12. Sama sõna nimekäänüssen Pruul om perekunnanimes 419 inemisel ja tegünemise kotussitki om rohkõmb, egäl puul üle Eesti.
Pruuli nimi om eesti keelen inämbäste tõsõn välten, a võrukeeline välläütlemine om kolmandan välten [`pruuli]. Täpsäle ei tiiä, kas sääne välläütlemine *pruuli võisõgi olla sõna tähendüsen ’ollõpruulja’ nimekäänüsse kuju. Egäl juhul just Tartumaal om Pruuli olnu hariligumb nimi ku Pruul.
Tartumaa pandmisõ kotussõ omma Härjanurme mõisa Jõgeva lähkün (talunimest), Suurõ-Ulila mõisa Puhjan, Kavastu mõisa, Jaamamõisa Tartun. Vana-Nõo mõisa hingelugõmisõn om seo nimega Meeri mõisast peri ja säälsest talunimest priinime saanu perekund. Meeri suguvõsa nimi Nõo keriguraamatin om sõski Pruul. Unipiha mõisan om vastapiten, hingelugõmisõn küll Pruul, a mõni säält suguvõsast om lännü edesi ka nimega Pruuli. Sangaste-Rõngu Soontaga mõisa Pruuli kuuli külh vist kõrraga vällä.
Võrumaa kotussit om kats. Valgjärve mõisan pand’ opõtaja Roth joba 1809. aastagal nime kujul Pruli Kööninge Juhani ja Ado perrile. Hingelugõmistõ 1834 panti küll Pruul, a päämidselt jäivä perrätulõja nimega Pruuli. Vaabina mõisan panti Pruli Pruuli talun. Seo om Õdagu-Võrumaal päämine Pruuli suguvõsa. Talu esi om täämbä tunnõt ku Pruuli-Kaska viinamar’atalu.
Vanal Harjumaal om Pruuli nimi pant Valtu mõisan Rapla kihlkunnan. Järvämaal panti seo nimi Pähu mõisan Järvä-Jaanin. Orgmetsa mõisan Järvä-Madissõl panti talun kiräligu nimega Prueri priinimi Prual. Ka säält suguvõsast on tulnu nimme Pruuli.
Virumaa päämine nime Pruuli tegünemise kotus om Rakvere mõisa. Pääle naidõ kotussidõ või olla muutunu ka mõni muu nimi vai nimekuju, kon samma tähendüst ’ollõpruulja’ om edimält kirotõt rohkõmb alambsaksa muudu, nt Pruwel.
Eestistämisel muudõtigi nelläl kõrral Pruulis nimi Pruvel. Katõl kõrral muudõti är hariligu saksa keele sama tähendüsega Brauer. Viil võti hindäle Pruuli nimes üts Borunov ja üts Brun.
Poliitigamiis, ümbreilmarändäjä, reisikõrraldaja ja kiränik Pruuli Tiit om uma nime saanu Tartumaa Härjanurme suguvõsast.
Saarõ Evar
Rubriigin kõnõldas perekunnanimmi periolõmisõst ja tähendüsest.
