11. arvamisfestivalil Paidõn oll’ 20 lavva päält 150 arotusõga. Noidõ hulgan Võromaa arõnduskeskusõ ja Tarto Ülikooli eetikakeskusõ kõrraldõt arotus «Müütiline mahepiknik».

Arotusõ kõrraldamisõ mõtõ sai härgütüst «Tarto 2024» projekti «Tarto maailmaülikuul» teemadõst. Arotust vidi Eesti põllumajandusõ-kaubanduskua nõvvokogo liigõ Pikkmetsa Mirjam ja Võromaa puult võtiva sõnna mahepõllumiis Mõttusõ Meelis ja Võromaa arõnduskeskusõ mahheteema projektijuht Kesküla Kaja.

Mahhesüük ja -põllumajandus paistus pall’odõ inemiisi jaos innemb luksus ku hädätarvidus. Säändsele arvamisõlõ andva huugu essütävä müüdi mahhesöögi kotsilõ. Näütüses: mahhesüük om kallimb; mahhetuutminõ passis õnnõ väikuilõ tuutjilõ; mahhesüüki jakku-i nigunii kõigilõ jne. Nuu müüdi võeti üten kullõjidõga arotusõlõ ja märgotõdi, kost nuu peri omma ja kuis näid ümbre tougada. Viil küsüti, määne vaih om mahhe- ja tavapõllumajandusõl, kuis nä mõosõ elorikkusõlõ ja mändse raskusõ omma köüdedü mahhesöögi kasvatamisõ ja pruukmisõga.

Kesküla Kaja, kiä arotust kõrralda avit’, ütel’, et om tulõmiga väega rahul: «Saimi teedä, et mahhe- ja tavatuutja mõtlõ-i periselt väega erinevält. Otsus minnä tavatuutmisõlt mahhetuutmisõlõ läässi laapsambahe, ku toolõ avitasi parlatsõst inämb üten riigi poliitika ja tugõmiskõrd.»

Arotus oll’ hää sissejuhatus Rõugõn 8.–9. süküskuul tulõvalõ kogokunnafestivalilõ «Ma tiiä, kost tulõ mu süük», kon mahhesöögist pall’o kõnõldas. Rõugõ festivali lõpõtas arotus, kon kõnõldas, kuis saia avalikku toitlustustõ inämb paigapäälist mahhesüüki.

Laanõ Triinu

Arotusõ vidäjä Pikkmetsa Mirjam, Mõttusõ Meelis, põllumajandustiidläne Selge Are, Tarto liina toitlustusteenüse hankõspetsiälist Sõstra-Oru Sirle ja Kesküla Kaja. Paaveri Triinu pilt