Moodukaup
Viiekümnendide aastidõ lõpun es liigu Eestin viil parõmbat-muudsambat kaupa. Kongi Lätimaal oll’ naatu kruuduliidsi sukkõ tegemä. Nuu olli väega moodun.
Üts tütrik läts’ tandsupidolõ ja täl olli kah kruudulidsõ suka jalan. Täl oll’ hirmsalõ lüüki: poisi õnnõ tedä tandsma võtiki.
Komsomolitüütäjä oll’ pidol uma pruudiga ja pruut uursõ tütrigu käest, kost tä nuu suka om saanu. Tütrik ütel’, et vanatädi saatsõ Ameerikast pakiga. Periselt oll’ tä tušiga jalgu pääle kruudu joonistanu ja sis suka pääle tõmmanu. Komsomolitüütäjä pruut pahand’ uma peigmehega terve õdak, et esi om tähtsä tegeläne, a säänest kaupa kätte ei saa.
Pido lõppi är. Tütrik jätse austaja kultuurimaja ussõ pääle perrä vahtma ja läts’ kodo jalgu puhtas mõskma. Oll’ tükk vaiva, et tušš jalgu päält maaha saia.
