Kangro Bernardi kirändüspreemiä vei hindäga timahava Võromaalt Paidõlõ üten Võrolt peri Ukraina juuriga luulõtaja, tõlkja ja kirändüstiidläne Kotjuhi Igor.

Preemiä sai tä seo aasta vällä tulnu aovaimolidsõ luulõkogo «Sireenid ja sähvatused» iist, kon tä pututas mi ilmanuka viimädse ao tummõmbat puult: koroonapuhahust ja sõta Ukrainan. Kronbergi Janika Kangro-preemiä välläandmisõ tüükogost ütel’, et teemadõ poolõst kül aotlinõ, om raamadu luulõritu seen ummõtõ mõttit, miä küünüse üle ao.

Kõgõ seod ilma lahkva kõrval näütäs kogo «Sireenid ja sähvatused» sildu tegünemist luulõtaja hindä seen, näütüses timä eesti, võro, ukraina, valgõvinne ja vinne keele vaihõl.

Kiili kõrval om Kotjuhi Igor anniga viil mitmõ ala pääle: nii om tä koolioppaja ja avitas ukrainlaisil eesti keelega tutvas saia, kõrraldas üritüisi ja tege bändi, uur Eesti vinnekiilse kirändüse aoluku ja pidä mõnikõrd viil DJ-ammõtit. Preemiä kätteandmisõ pidol Võro Kreutzwaldi muusõumi aian valisigi pääväkangõlanõ rahvalõ ettevõtmisõ vaibiga pasvat tujomuusikat – viise, mille pääle om säetü eesti kirärahva luulõ.

Elo om Kotjuhi Igori latsõpõlvõkotost Võrolt kavvõmbalõ veenü, a tä kinnüt’, et tulõ Võrolõ kõgõ hää meelega. Käve timahava suvõlgi. Tä näge liinal ka suurõmbas saamisõ ruumi ja tulõt’ miilde umma innembäst mõtõt, et Võrost võisi saia Eesti kirändüspääliin.

Kangro-preemiät om täämbädses vällä antu joba 34 kõrda. Kotjuhi Igor sai seo tunnustusõ tõist kõrda. Preemiä-kommisjon kaaldsõ timäga kõrvuisi viil Karja Stepani, Kauksi Ülle, Kürsa Ere ja Kelbä Heiki minevaastast luumistüüd.

Kangro-preemiä välläandmist võtt iist Võromaa arõnduskeskus.

Kabuna Kaile

Kiränik Kotjuhi Igor (edeplaanil) üten fotograafist vele Kotjuhi Dmitriga Kangro-preemiä vastavõtmisõl. Rahmani Jani pilt