Jäl om süküs käen ja jälki kuulutas Uma Lehe toimõndus vällä suurõ sügüsedse jutuvõistlusõ. Seo om sis joba 20. aastak, ku kutsumi üles põnõvit juhtumiisi võro keelen kirja pandma.
Taa aoga om mitusada inemist ummi juttõ lehetoimõndustõ saatnu. Omma tegünü kimmä kirotaja, a egä aasta tulõ ka mõni vahtsõnõ mano. Kimmäle om paras julgustükk uma lugu võro keelen kirja panda ja lehte saata, a nuu julgõ inemise omma olõman. Ja näid tulõ kimmähe mano.
Kokko saa naist jutõst võrokõisi lugu. Seo om nigu kangas, midä mugu pikembäs ja pikembäs koetas. Võistlusõlõ saadõdu jutu, miä lehte jõudva, jääse aigõ lõpuni kohegi alalõ.
Julgust ja jõudu kõigilõ, kiä timahava ummi juttõ saata plaanva. Terävät sulgõ ja lustilist miilt!
Rahmani Jan,
Uma Lehe päätoimõndaja
