Sügüsene laadu-aig om käümä lännü. Minevä puulpäävä oll’ mihklilaat Sulbin, a tulõman om viil mitu suurõmbat laata.

Sulbi mihklilaada pääle oll’ timahava tulnu kauplõjit inämb ku varatsõmbil aastil: kogoni 350 ümbre. Ka ostjist es olõ puudus ja kõrraldaja olli ette valmistanu kirivä laadakava. Üts müüjä tiidse kõnõlda, et inemiisil rahha om, a tuu kulutamist kaalutas timahava hulga inämb ku varrampa. Siski paistu, et kauplõminõ käve kõva huuga.

Ligembäl aol om tulõman viil mitu sügüsest laatu. Joba seo puulpäävä, 7. rehekuul peetäs Võro liina keskplatsi pääl Uma Meki suurlaatu ja mahheturgu. Tuu laadu pääl kaubõldas innekõkkõ Vanal Võromaal kasvatõdu talokaubaga. Eräle ala om sääl Uma Meki võrgustigu liikmile ja mahhetuutjilõ. Müvväs ka paigapäälist käsitüüd.

Nätäl ildampa, 14. rehekuul tulõ Ihamaru küläkeskusõ man Kostitii päiv Postitii pääl. Ka sääl kaubõldas käsitüü ja söögikraamiga. Lisas kauplõmisõlõ tetäs tuu päiv hulga võistluisi, rahvas vali vällä kõgõ parõmbat söögikraami. Muiõ avvohindu siän andas vällä Karaski külä preemiä kõgõ parõmba karaski, Varbusõ külä preemiä kõgõ parõmbalõ veini ja Puskaru külä preemiä kõgõ parõmba puskari iist.

Süküslaatõ huuaolõ pand simunapääväl, 28. rehekuul punkti Lindora laat. Tuu om mi kandi kõgõ tunnõtumb pikä aoluuga laat. Et timahava trehväs simunapäiv puulpäävä pääle, või arvada, et nii müüjit ku ostjit lätt Lindorra hulga.

Rahmani Jan

Sulbi mihklilaadalõ oll’ tulnu läbi laada aoluu kõgõ inämb kauplõjit ja ka ostjist es olõ puudust. Rahmani Jani pilt