Mineväst tõsõpääväst läts’ käümä võrokeeline karmanihelü «Poodi man», midä vidävä noorõ võrokõsõ SAARÕ HIPP ja RAJU ELIISABET. Pia tunniaolist internetijutusaadõt saa kullõlda helüait.ee lehe päält ja saatit plaanitas tetä egä katõ nädäli takast. No kõnõlõsõ saatõ tegijä kõgõst lähkümpä.

* * *

Kuis tull’ mõtõ tetä karmanihelü «Poodi man» ja mis tuust mõttõst edesi sai?

Hipp: Võro seldsi tegemiisi man ja Tarton võro keelekohvikit teten tull’ mitu kõrda jutus, et olnu hää, ku olõs võrokeeline karmanihelü. A suur murõ oll’, kiä tuud mõistnu tetä. Ja ma es mõista kedägi tegemä sundi. Mõtli, et võta esi kätte, ja kutsõ Eliisabeti kah appi.

Eliisabet: Ma olli Hipõ man külän, märgotimi mugu ilmaasjust, ku üts hetk halgaht’ mõtõ, et või-olla võinu kinkalgi olla põnnõv mi juttu päält kullõlda. Mõtlimi, et võrokõisil viil olõ-õi kimmä kõrra perrä ilmuvat karmanihellü ja tuu tulõ är tetä!

Kas säänest asja om kerge vai rassõ tetä ja mis taa kerges vai rassõs tege?

Hipp: Kõgõ rassõmb oll’ vast vällä nuputa, kuis salvõstustehnikat, stuudiot ja kokkolõikajat saia. Ku ma ei olõs nännü Instagramin, et Võro liinan om sääne kotus nigu Võru HUUB, kon Võromaa nuurilõ om salvõstusteenüs massulda, olõs vast asi tegemäldä jäänü. Säält olõmi hulga api saanu, olõmi väega tenoligu.

Eliisabet: Ma usu, et kerge vai rassõ olõ-õi tan ilmaruumin ütski asi. Seo karmanihelü tegemine om hoobis põnnõv ja lustilinõ. Mullõ vaihõpääl tunnus, et jagami Hipõga ütte ajupuulkerrä, saami kipõstõ ütstõõsõst arvo ja plaani paika.

Kuimuudu «Poodi man» vasta om võetu?

Hipp: Mõtõ paistus miildüvät suurõlõ hulgalõ inemiisile ja tollõ iist olõmi saanu tunnustust. Periselt ei olõ kullõjit viil maru hulga olnu.

Eliisabet: Seoniaoni omma kõik sõnumi, kommõntaari, vastamõjo ni märgotusõ olnu õnnõ perädü positiivsõ. Ma iks luutsõ, et mi ettevõtminõ võinu kinkalõgi kõrda minnä, a säänest ovatsiooni, miä meid uutsõ, es kujuta kül ette. Kõgõ hellembäs tegevä süäme komplimendi, miä tulõva inemiisilt, kiä muido võro kiilt kõnõlõ-õi, a iks kullõsõ mi seletämist.

Kiä võinu ti saatõ kullõja olla?

Hipp: Tsihimi umma saadõt umavannuidsi ja koolinuuri poolõ. Tahami jaka hindä kogõmust ja kutsu küläliisi, kiä avitasõ vallalõ kõnõlda määnestki uma tii löüdmist. Pääle tuu om plaan kõnõlda veidükese võro liikmise aoluust, midä mivannudsõ umast pääst ei mälehtä, a vanõmba miildetulõtamisõs või-olla kullõlda tahtva.

Eliisabet: Ku kõgõ värskimbat statistikat kaia, sõs kullõsõ meid inemise egäst vannusõst, kuigi lõviosa jääs iks mi vannusõklassi. Seo omgi taa mõttõga tettü, et egäüts võinu siist löüdä hindä jaos midägi vahtsõt vai hoobis nostalgilist. Muidoki saa ülda, et väiku tagamõtõ – rohkõmb nuuri kodokandi kiilt kõnõlõma härgütä – om olõman, a tuu tähenda-i, et mi jutt õnnõ milleniumlaisilõ kõrda lätt.

Määndse plaani omma «Poodi man» saatõga edesi?

Hipp: Parhilladsõ plaani perrä tulõ vahtsõnõ osa inämb-vähämb katõ nädäli takast ja egä kõrd om päält mi ka üts äge küläline juttu kõnõlõman. Vähämbält jõuluni teemi kimmäle, sis kaemi, kuis edesi jõvvami.

Eliisabet: Aig näütäs, mis edesi saa. Parhilla om nimekiri inemiisist, keda võinu kutsu juttu ajama, mitmõ huuao pikku.

Küsse Rahmani Jan

Karmanihelü tegijä Raju Eliisabet ja Saarõ Hipp stuudion. Pilt videost