KOMMÕNTAAR • Minevä puulpäävä peeti Võro liinan Liiva uulitsan Ate moro pääl inspiratsioonifestivali «Loovus loob lootust». Kokko oll’ tulnu küländ suur hulk mi kandi luujit inemiisi, inämbüisi noorõmba põlvkunna rahvas. Kõrraldajidõ tsihis oll’ vahtsidõ asjo luumist julgusta ja kõnõlda tuust, määndsit võimaluisi pakk luumisettevõtlus.
Päält pääettekandidõ tetti ka tüütarri, kon sai teedä, kuis äriplaani tetä, hääd teksti kirota, telefoniga umma kaupa pildistä ja umalõ loomingulõ hinda panda.
Mullõ jäi tuun päävän kõrvu mitu asja. Kõgõst jutust es saa ka peris häste arvo, selle et ei olõ luumismajandusõ, äriplaanõ ja muu säändsega väega kursin. Tuuperäst paistu mõni jutt paiguldõ rahva hullutamisõ muudu, esieränis lõpmalda kasumist ja kultuuri iist suurõ raha küsümist pututav. Mullõ paistu, et «elokutsõlidsõ koolitaja» pruuvva kõnõlda tuud, miä näide meelest kullõjilõ miildüs.
A õnnõs oll’ tuu väiku jago pääväl kõnõldust. Inämbüs ülesastjit olli kultuuri ja kunstiilman tegotsõja ja nimä olli ausa ja tiidsevä täpsele, minkast kõnõlõsõ. Päävä alostusõn üteldi vällä, et mi kandi kultuuritegemiisi kimmäs tagapõhi om uma perimüskultuur, ja tuu pandsõ kõgõlõ kõnõldulõ selge pitseri.
Mullõ tundu, et kultuuritegijide noorõmba (keskikkä jõudva) põlvkunna jaos om umakultuur peris loomulik, a ummi tegemiisiga nä periselt umakultuuri mano viil jõudnu ei olõ, omma kongi poolõ tii pääl. Tuu om kül hulga parõmb ku perimüse maahasalgaminõ ja and luutust, et ütskõrd saava na periselt uma maa perimüse kandjis.
Jutupäävä päämine mõtõ oll’ mu meelest tuu, et hulk kultuuri seen toimõndavit inemiisi sai kokko, umavaihõl juttu aia ja teedä, kuis tõisil tegijil lätt. Päiv and’ mikandi kultuuri täämbädsest saisust kül tsipa ilosamba pildi, ku asi periselt om, selle et kõnõlõma olli kutsutu nuu, kinkal lätt häste. A päävä lõpun kõlasi ka tõsitsõmpi ja tõõperälidsempit nuutõ.
Tegijile andva säändse kokkosaamisõ vahtsit mõttit ja luumisõ energiät. Tuu oll’ kah seo jutupäävä selge kasu, ku ettevõtlusõ keelen kõnõlda.
Rahmani Jan
Festivali aos oll’ Võro liina Ate maja ette tammõpuu varjo üles säetü esinejide lava. Meistri Madisõ pilt
