Tuu oll’ sügäväl nõukaaol ku Moskvah oll’ Brežnev pukih ja meil olliva säältpuult tulnu säädüse jõuh. Üts noist oll’ sääne, et kihvtidse tüü iist om tüütegijile ette nättü egä päiv puul liitrit piimä.
Ma olli tuukõrdsõ ENSV kalamajandusõ valitsusõ all toodangu kvaliteedi juhtmist kõrraldamah. Pääkontor oll’ meil sis Tal’nah, majah, koh nüüd om Swedpanga pääkontor. A mi projektiirmise büroo ja labori olliva liina pite egäle poolõ lakja lüüdü.
Kalakombinaatõst ja kolhoosõst tuudi analüüsis kastõ kaupa tuutõnäütit ja tuud kraami olliva kõik kotusõ täüs. Õnnõs mi, standardisiirjide tarõh es haisa kala perrä. Ma mugu kirodi ja tõlksõ nuid Moskvast tulnuid paprit ja mullõ tuud piimä es anda. A kõrvalkoridori pääl oll’ mi keemiä- ja bakterioloogialabor, koh puul liitrit piimä pääväh oll’ egäleütele ette nättü.
Labori nukka oll’ kogunõnu kastõ kaupa tühje piimäpudõlit ja nii tull’ iks vahel aig veidü kõrda kah luvva. Ma olli labori ja projektiirmise rakukõsõ ammõdiühingu massukorjaja kah ja egä kolmapäiv käve nuid Brežnevi pakikõisi toomah säält Hendriksoni küürü kõrvalt ütest Stalini-aigsõst majast, koh viil nüüdki sirp ja vassar katusõalost kaunistasõ.
Ku tühje piimäputlit nakas’ sääl laborih jo nii pall’o olõma, et käümise ruum jäi ahtakõsõs, sis oll’ aig naa kohegi puuti är viiä. Meesterahvit meil pundin es olõ, a mi, tugõva naasõ, egäüts kast, koh 20 poolõliitrist tühjä mõstut piimäpudõlit, astsõmi rian Vana-Posti 7 majast Suur-Karja uulidsa söögipuuti. Tuu oll’ kül säälsaman nuka takan, a parajahe oll’ Sõprusõ kinotiatrist suur mass inemiisi uulidsa pääle tulnu ja mi pääkeemik Niina sattõ käpilde uma kasti otsa maaha. Tõõsõ ollimi jo vapralt puuti jõudnu.
Poodimüüjä naas’ noid kastõ leti takan riita säädmä, a äkki visas’ üte kasti maaha ja pand’ nigu ratta pääl rüükmä: «Appi, hiir, appi, hiir!» Hiitünült juusksõ tä riioli vasta, kost kaup nakas’ maaha sadama.
Mi koolisõsara Ainoga jäimi nigu soolasamba saina viirde saisma, a puut juusk’ rahvast tühäs. Pidimi iks müüjä är uutma. Ma lätsi leti takast kaema, mis täst sai, a timä oll’ pistü tooli otsan ja värisi ku haavaleht.
Lõpus saimi iks uma pudõliraha kätte. Kraamsõmi kinotiatri iist katskidsõ pudõli kah kokko ja lätsimi laborihe tuud juhtumist arotama.
Plumanni Kaja-Riina
Reimanni Hildegardi tsehkendüs
