Kooni 25. radokuu pääväni saa esitä kandidaatõ hindätiidmise avvohinna välläandmisõs. Konkursi noidõ ärmärkmises, kiä paigapäälitsist väärtüisist kõgõ inämb huulva, kuulut’ Võro instituut vällä üten Võromaa arõnduskeskusõ ja Põlvamaa umavalitsuisi liiduga. Hindätiidmise avvohindu om mõnõ aasta takast vällä ant joba 2012. aastagast pääle.
«Vällä võinu pakku noid, kiä julgusõ näüdädä hinnäst võrokõsõna, kink tegemiisin om tunda võrokõisi kuraasi,» seletäs Võro instituudi projektijuht Toomõ Triin vallalõ tuud, määne võinu olla ärmärkmist väärt kandidaat.
Avvohinna saajas võiva olla nii eräinemise ku asotusõ. Kõrraga andas vällä mitu hindätiidmise avvohinda. Tuu man kaias, kuis kandidaat hindätiidmist ja hindäspidämist vällä näütäs, kuis timä tegemise vällänpuul koto silmä nakkasõ ja kuis tä avitas võrokõsõs olõmist noorilõ edesi anda.
Kandidaatõ või vällä pakku egäüts. Avvohinna alospaprõ ja ülessäädmise vorm om Võro instituudi kodolehe wi.ee pääl. Ettepanõgi pallõldas saata Võro instituuti aadrõssil Tarto 48, 65609 Võro vai e-postiga triin.toom@wi.ee radokuu 25. pääväs (25.02.2025).
Rahmani Jan
Võro instituudi projektijuht Toomõ Triin kuts kõiki vallaliidsi silmiga ümbre kaema, et löüdä üles nuu inemise ja asotusõ, kiä omma väärt hindätiidmise preemiät. Rahmani Jani pilt
Seoniaoni omma hindätiidmise avvohinna saanu:
2012
• Orava põhikuul
• Sõmmõrpalo latsiaia keelepesärühm
• Haanimiihhi nõvvokoda
2013
• Haani kuul
• Põlva latsiaia Mesimumm Meelespea rühm
• Krabi külätiatri
2016
• Mamastõ latsiaia ja kooli keelepesärühm
• Lepassoni Marju
• Orava kuul
• Võromaa Spordiliit
2018
• Rõugõ latsiaia keelepesärühmä
• Põlva latsiaia Pihlapuu Vanderselli rühm
• Mõnistõ kuul
• Puiga põhikuul
• Mõtsavelle talu
• Laheda muti
2020
• Harglõ latsiaid-põhikuul
• Kuldri latsiaid Sipsik
• Tal’na Võro Selts
• MTÜ Folgisellide Selts
• Ruuli Helve
2022
• Võro latsiaid Sõleke
• Põlva Jakobi kuul
• Põlva folklooriandsambli Käokiräs
• Orioni Jana
