Tävveste tundmalda tähetark Toomsaarõ Elspet om katõlõtõistkümnele tähemärgile 2025. aastagas vällä valinu pasva võrokeelidse laulu ja paotas tsipakõsõ ust, midä aastak tuvva või.
 

Oinas 21.03.–20.04.

 
Su aastast kõnõlas laul «Ma istu ja istu ja är ei lää». Oina miil ni tegoviis tüküs kõgõlõ vahtsõlõ vai tõistsugumadsõlõ sõrgu vasta ajama ja taha-i vanast paigast vallalõ üteldä. Olku sääl vana kotussõ pääl istu sis hää vai halv. Vahtsõnõ aasta tuu sullõ kimmäle üten hulga istmiisi nii tüü- ku ka pidolavva takan, suvõtiatrin vai pukin. Ku mõnikõrd paistus, et tahtnugi es pistü saista, om soovitus mõnikõrd iks pistü saistata ja pruuvi astu vai tandsi. Sis võit viil parõmba istmiskotusõ löüdä.
 

Pull 21.04.–20.05.

 
Timahavva saa-i sa üldä, et murrit sukugi olõ-i. Näid om veidü. Su aasta kotsilõ passiski häste laul «Murõt ei olõ». Ku edeotsa paistus, et om väega hulga, sis järeligult perämädsen otsan piaaigu ei olõki naid. Tuuperäst või arvada, et nuu väiku murrõ jääse aasta edeotsa – või tulla häti lumõlapju käepidimä, tomadikasvõ kasvulambi vai vatukukli moosiga. Tõsõ hädä jääse olõmalda vai saat noist müüdä kerge vaivaga, rassõmbidõ häti iist pagõmisõ man avitas pullitegemine.
 

Katsiku 21.05.–21.06.

 
Seo aasta võit nii mõnigi kõrd löüdä hinnäst mõtlõmast, kohe lätt su tüü, vaiv, raha ni abijõud. Tähe omma tennü vagivahtsõ löüdmise: tuu lää-i lufti vai taivahe, a inämb aiamaa, nurmõ ja küläteie sisse kinni. Olkõ nuu sis vägevä õdagudsõ kohtingu, jaaniüü romantika vai pikk murõhtaminõ, miä edesi saa. Pia võinu tuu suhtõ kimmämbäs klaari – kas tulnu är Liina manu elämä minnä vai avita tuud vallavolikogon teraapian käümisega parõmbas tetä. Välläpäsemise või tuvva rehekuu. Kullõ häste laulu «Ma olõ suhtõn maaga»!
 

Vähk 22.06.–22.07.

 
Seo aastaga tahat löüdä hindä jaos seninägemäldä paiku, pall’o reisi, muido ilma piten ümbre kaia ja vällä uuri, kiä sahistas haina seen ni kohe kiäki magama hiitäs. Kukki reismisega loodat väega hinnäst kah löüdä, ei või tuu nii sukugi sündü, selle et inne tulõ löüdä maailma viir. Kõgõ vahtsõmba lainõsagõhusõ kuulutasõ, et maailma viirt võit otsma minnä Naha, Parmu vai Pedäspää küläst. Ku olõt veere löüdnü, kullõ laulu «Istsõ ma maailma veerekese pääle».
 

Lõvi 23.07.–22.08.

 
Timahavva piät väega ette kaema egäsugutsidõ pättega, kiä tahtva su käest panga- vai krediitkaardi nummõrd, pin-kuuti, armastust vai poodi man kattõ eurot. Är kullõlgu, midä ütles vai ütle-i laul «Ütle mullõ uma telehvooninummõr» – sa märgi iks uma pääga. Ku iks muido ei saa, lasõ hindäst möürähüs vai imälõvi vällä, lüü trummi vai marsi minemä. Suvõl peesüdä päävä käen ja sa näet, et kõik lätt kõrda. Sügüse lätt kõik jäl vanna rüüpehe tagasi.
 

Neitsü 23.08.–22.09.

 
Vahtsõnõ aasta tuu sullõ päähä hulga vahtsiid ettevõtmiisi, midä tahat täüde viimä naada. Om hää aig pääle naada spordi ni virgutustegevüisiga, näütüses kepikäümine ja muu kargus. Sammutsihi täüssaamisõ man pruuku-i laulujuppi «ei olõ hullu, ma eelä eski sai», egä plaan tulõ lõpulõ viiä. Kül tulõ hoolõga kaalu, ku korgõs tollõ tsihi säet – taivaskaalal või tuu jäiä 50 kooni 50 000 vaihõlõ.
 

Kaalu 23.09.–23.10.

 
Su sisen om kats kitsõ – üts tahtnu süvvä kõik kaararõugu pall’as, tõnõ pitä kimmäst huult tuu üle, määnest haina vai putsu sisse ajat. Seol aastagal või kitsi vaiõlus suurõs minnä, et kuis ni midä süvvä. Murõhtat, mitu viilu suidsulihapalakõist süvvä võit vai kas võidu võit võidu. Tõsõ su vaiõluisi ei kuulõ ja ei näe, nii et piät esi noidõga är taplõma. Api ni meelekindlust võit luuta rüäleevädieedist vai kar’ankäümisest. Laul: «Kats kitsõ».
 

Skorpion 24.10.–22.11.

 
Laul: «No kos tuu Iphone jäi?». Võit löüdä hindä jaos rassõ peris maailmaga järe pääl püssü. Sa proovit väega olla kursin egä uudissõ, arvamusluu ni avastusõga, a sakõstõ ei olõ sa õks rahul ja tahtnu teedä saia viil ja viil, päält tuu kommõntiiri, rüüki ni vaiõlda. Tuust või sõltuvus saia ja ku ütel pääväl inämb puutri mant är ei saa, om käen suur hädä. Proovi aigsalõ tõisiga kõnõlda hariligõst egäpääväas’ust nigu ilmast ja armastusõst. Kullõ hulga muusikat ni opi selges mõnõ tsirgu laul. Hää õnnõ toova kuldnoki nägemine ni edimäne kurg.
 

Vibumiis 23.11.–21.12.

 
Laul: «Litsmõtsa tango». Tunnõt suvõkuiõ aigu suurõmbat suuvi uma sugupuu ni juuri vasta. Tegünes suuv oppi, kuis sõira tetäs ja hobõsõga virksit aias. Võit pruuvi eski suguvõsauurmist ja ummi kuulsidõ sugulaisi löüdmist. Esiasi om, kas lövvät noid tiidjiid üles, kiä opata ni avita mõistva. Kanna egä päiv hindäga üten vikatit, juhus ku sa pidänü hindä edevanõmbidõ haina sisse kasunu talukotussõ löüdmä.
 

Kivikits 22.12.–20.01.

 
Laul: «Perräjäänü». Olõt timahavva inämb mõttõn elo suuri asju üle: kost tulõ bussipuut, määnest värmi om armastus ja mis sust perrätulõjilõ perrä jääs. Suurõ küsümüse vaivasõ sinnu mõõdukalõ ja võiva mõnikõrd sällä haltama panda, a periselt ei murra. Üte huuga avitas sällä- nii süämehallu paranda jooga vai muud sorti võimõlus. Esieränis hää, ku tuu om köüdet sannaga – avitas leil sagõhusõl üts kõrd nellä poolõ minodi pääle ni kõoviht.
 

Viikaldaja 21.01.–19.02.

 
Laul: «Mar’a-aid». Vahtsõnõ aasta lupa sullõ alostusõs egä päiv kusõhädä, keväjä häitsemise aigu või uuta silmi süütmist ni tiidmäldä sorti allergiat. Parõmb nakkas mar’aaigu, ku sitikmar’a vitamiinitaastamisõ man hääd tüüd tegevä. Kõgõ suurõmbas vainlasõs omma hüürläse. Hoia hinnäst määnüisi ubinidõ ja makõ joogi iist! Unõn võit nätä latsõpõlvõmälehtüisi, a päämädselt hüürläisi, vaihõpääl viskas mõnõ vaablasõ sisse.
 

Kala 20.02.–20.03.

 
Laul: «A mille?». Tähe näütäse sullõ vaimoelo heränemist, võit tunda tahtmist minnä jäl kuuli. Tuu ei piä olõma opma minek, või-olla läät latsilõ jõuluvanna mängmä, avitat krõnglit kütsä vai läät küllä vanalõ oppajalõ. Sul om hulga küsümüisi ilma kotsilõ, hää aig om kirotamisõs vai laululuumisõs. Edimäne tagasiside või olla väega karm, a ku juhendaja pääle väega kõvva röögit, lätt viil hullõmbas. Hää om pruuvi ristsõnnu lahenda vai lukõ läbi võro sõnaraamat.

Reimanni Hildegardi tsehkendüse