Tunnõt Võromaa muusik ja laululuuja Kalkuna Mari võtt’ aasta edimäidsil päivil üles pia päälenakkavalõ raamadu-aastalõ pühendedü laulu. Laulu kirot’ Mari elävä klassiku Runneli Hando luulõritu pääle.

«Eesti kirändüse selts tõtõstõ telse mu käest raamaduaasta laulu,» kõnõlõs Kalkuna Mari vahtsõ laulu sünnüluku. «Ku ma näi taad Runneli Hando teksti, sõs mul tull’ õkva tuu pääle meloodia. Kuigi luulõtus esi om tsipakõsõ mõtlik ja esiki ütiskunnakriitiline, sai lugu peris ilolinõ ja huugu täüs,» löüd Mari.

Hariligult om Kalkuna Mari tett laulõn tunda perimüsmuusiga mõjjo – nii om seokõrd kah. «Sõnnun om seen ütsjago perimüslikku – algriimi pruukminõ ja puhkpilliimitatsioonilik tutu-luutaminõ,» seletäs tä.

Tuust Runneli tutu-luu-tekstist sai Mari mõttõ kutsu hindäga punti tunnõt saksofonimängjä Fausti Maria. «Timä mängse luun är terve orkestri jago saksofoni,» and autor tsipa vahtsõst laulust aimu.

Lugu om plaanin avaligus tetä raamaduaasta alostusõn. Raamaduaasta nakkas pääle seo kuu 30. pääväl ja kest kooni tulõva aasta imäkeelepääväni.

«Lugõgõ sõs 2025. aastal pall’o raamatit!» suuv Kalkuna Mari kõigilõ lehelugõjilõ.

UL

Muusigu Kalkuna Mari ja Fausti Maria seo aasta edimäidsil päivil Tarton Ö Stuudion laulu ülesvõtmisõ vahepääl raamatidõga poosõtaman.