8. vahtsõaastakuu pääväl peeti Rõugõ rahvamajan Võro maakunna kultuuri-, raamadukogo- ja muusõumitüütäjide, käsitüümeistride ja kultuurikollõktiivõ juhendajidõ tenoõdagut.
Tuul õdagul jagati kultuurkapitali Võromaa ekspertgrupi, rahvakultuuri keskusõ ja Võro instituudi tunnustuisi ja preemjit. Kokko anti vällä 35 kultuuri valdkunna avvohinda.
Noist kõgõ korgõmb preemiä oll’ kultuurkapitali vällä ant Kultuuripärl, tiitli sai seokõrd Aropi Erja. Erja om hengega muusigaoppaja, dirigent, rahvamuusik, pääle tuu viil kõva Võromaa kultuurielo edendäjä.
UL
Võro maakunna kultuuripreemjide saaja ütidse pildi pääl, häädkätt nukan Aropi Erja. Männe Tiina pilt
