Tan om tegemist vähämbält kolmõst eri keelest peri nimmiga. Nakkami pääle nimega Malin, minkal om 23 kandjat. Täämbä om ka Tartu kunstnigu Malina Ilmari 101. sünnüaastapäiv. Timä suguvõsa nimi panti vanan kiräviien algkujul Mallin Võisiku mõisa Odiste külän Kolga-Jaanin. Malina talu om Odisten täämbädseni. Priinime saajidõ edevanõmbas oll’ Wekrama Mallin, kiä sündü 17. aastagasaal ja kuuli 1751. Ku kaia, kost sääne edenimi peri om, sõs kõgõ parõmbalõ sobis vinne kiil. Mehenime Malin vai Mallin alussõs sobilik Malina oll’ 15.–18. aastagasaal slaavi kiilin mehe edenimi, varahampa Ukrainan, ildamba Novgorodimaal. Nimi es tähendä joht vabarnat, taa ollõv hoobis tulõtis sõnast, miä tähendäs väikut.
Eestin om ka viis perekunnanime Malina kandjat. Näide puhul om hoobis kõgõ tõenäolidsõmb, et vinnekiilsin perrin, kon miihi nimi om Malin [maalin] ja naisil Malina, om tuu nimi tulnu läti keelest. Säänest läti priinimme nigu Māliņš ’savikõnõ, perremiis, kink elämine oll’ savimaa pääl’ kirutõdi läti vanan kiräviien Mahlin ja vinne tokustaatõn Малин(ь). Ka haruldanõ läti nimi Maliņš sõnast mala ’viir, kallas’ om tan võimalik.
Ka rannaruutslaisilõ Väiku-Pakril panti priinimes Malin [maalin ~ maliin]. Tuu roodsi nimi om innekõkkõ naasõ edenimi, lühemb vorm Magdalenast. Kas ka perekunnanimi tulõ tuustsamast, olõ-i teedä. Ka Hiiumaal pantu ja vällä koolnu nimi Malling või olla roodsiperäne.
Täämbädse Maling (19 kandjat) ja Malling (15 kandjat) omma nime Mulgimaalt, kukki ka Harjumaal Vaida mõisan panti kõrra Maling. Mulgimaa katõn algkodun Abja ja Pöögle mõisan panti vanan kiräviien Malling [maling]. Abja suguvõsa oll’ pikält elänü Mõnsi talurühmän, esiesä olli Kulli Jüri ja pääle tedä mitman põlvõn Kulli Volmer. Pöögle suguvõsa oll’ peri Ala-Univere talust, Univere Jaagu ja Näsäre Toosi poja.
Lembit Vaba om nimme Maling (Malling) pidänü lätiperätses, läti keelen sõnast mala ’viir, kallas’ tulõtõdus. Õkva Lätist tulõmisõ jälgi kummagi perre man olõ-i. Sõski panti Mäe-Univere talun priinimi Kalling, midä või pitä kah lätiperätses, täämbädsel pääväl Kalniņš ’mäekene’. Vast oll’ hoobis nimepandja lätläne? Egäl juhul oll’ Tartun tsaariaigu elänü Otto Malling Valmieran sündünü ja arvada peris läti nimega (Malings, normitult Maliņš).
Eestistämisel muudõti Mallin ja Malin vahtsõs nimes Maidle. Üts tõnõ Malin võtsõ nime Lillo, kolmas nime Maalinn. Oll’ ka muutminõ Maling > Maimre.
Saarõ Evar
Rubriigin kõnõldas perekunnanimmi periolõmisõst ja tähendüsest.
