Tarton Riiamäel galerii Pallas keldrin tetti minevä nädäli vallalõ ruumiinstallatsioon «Konku». Tego om egäsugumast kraami täüs kolikambriga, kost võit otsmisõ pääle löüdä kunstnigõ töid kah. Näütüse mõttõ sai kunstnik Margna Epp unõnäost ja tä luut, et näütüs herätäs kaejan latsõpõlvõmälehtüisi ja latsõmiilsüst, midä täämbädsel aol tüküs vähäs jäämä.
Margna Epu unõnäon oll’ parasjago kunstiinemiisi suvinõ kokkosaaminõ arvada kongi Võromaa vana talo man, kon huunõ olli tsipa väsünü mooduga. Äkki paistu kolikambri (konku) uss nigu väreht kultuurikihte muusõummi. Unõnägijä jäi Ilvese Aapoga arotama kolikammõrdõ tähendüst ja nä löüdsevä, et sääne kildakõnõ ao- ja kultuuriluun om pia kistuman, selle et vahtsõ panipaiga ehitedäs ülearvo valgõ, kõrraligu ja riiulit täüs. Ja sis jõudsõva sääl unõnäon Epp ja Aapo ütel ja samal aol arvosaamisõlõ, et hämäräle kolikambrilõ olnu vaia viil vähämbält ütte näütüst, et timä tähtsüst kõrras üles nõsta.
9. vahtsõaastakuu õdagus oll’ Epu unõnägo täüde lännü ja lustilinõ näütüs tetti vallalõ.
Päält Margna Epu ja näütüse tehnilidse ja koli-poolõ iist vastutaja Kalve Toomassõ omma ummi töid kolikambrilõ toonu Vana-Võromaaga köüdedü kunstnigu Kalve Kadri, Ilvese Aapo, Tapferi Ene, Somelari Riin, Tatriku Esta, Koka Kersti, Koka Veiko ja Paide Margret.
Kolikambrõ vallategemisel lõigas’ Ilvese Aapo lambakäärega lindi läbi ja Margna Epp kõnõl’ näütüsest, miä timä meelest om tähtsä selle, et herätäs kaejan mälehtüisi ja latsõmiilsüst. Üles astõ ka kunstikooli Pallas rektri Viirpalu Piret, kiä ütel’, et uut lõunaeesti kunstnigõ näütüisi häämeelega, selle et egä kõrd pakutas vallategemise aigu koton küdsetüt karaskit. Kalve Toomas näüdäs’ jälleki vällä luutust, et vast jääs tuu kolikammõr sääl galerii keldrin trepi all püsünäütüses.
A edimält om plaanin, et ruumiinstallatsioon «Konku» jääs kaemisõs üles kuus aos, nika ku 8. radokuu pääväni. Galerii Pallas aadrõs Tarto liinan om Riia 11.
Rahmani Jan
Pidolinõ vallategemine: Ilvese Aapo lambakäärega ja Margna Epp mujahusõga näon. Rahmani Jani pilt
