Lehekuu viimätsel pääväl peeti Mõnistõ mõisa pargin latsilõ ilmadu suur ja illus pidu.

Juunikuu edimeist päivä om alasi latsi kaitsmise pääväs kutsut ja om vääga hää, et kommõt latsilõ ütel pääväl aastan õigõ pall’u hääd miilt tetä ei olõ maha jäet, olkõ külh, et armsa ja tähtsä omma naa ega päiv.

2023. aasta sügüselt naksi Mõnistõ nuurikeskusõ majan ega nätäl kuun käümä noorõ imä ummi väikeisi ja ka suurõmbõidõ latsiga. Latsõ saava sääl üten asju tetä ja imä umavahel juttu aia, kodutsõist murhõist ja latsi kasvatamisest kõnõlda. Et alasi kimmäde ka joonistõdas ja käsitüüd tetäs, valiti nimes luumisõtsõõr Rõõmurullid.

Võsu Reet, Varuski Kristel ja Vaidre Eneli kõnõli, et neide kamban om latsi vanussõn aastast katõtõiskümneni ja kuun käümise saal om enämbüisi rahvast täüs. Üten peedäs sõbrapäivä, vastlapäiva ja munapühhi, a minevä suvõ tull’ noorõl rahval mõtõ kõrralda pargin ka latsi kaitsmise päävä puhul üts suurõmb pidu. Jo tuukõrd tull’ küläliisi armõdu pall’u ja ka peris kauõst, kokku päält 270. Info oll’ häste edesi joudunu.

Reet, Kristel ja Eneli esi arvasõ, et neide, tuu tähendäs kõiki latsõvanõmbõidõ ja naide perekondõ pidu kõrraldamine läts’ laabsalt, toetajaid-sõpru oll’ pall’u ja latsõ saiva pallu kingitüisi, tuuperäst kõnõldi Mõnistõ latsipidust edesi umilõ tutvõilõ. Nii oll’ tinavasta piduliisi päält 400! Tultu oll’ Tallinnast ja Tartust, Valgast ja Võrust ja viil mitmalt puult.

Medä latsõ tetä ja nätä sai, om peris keeruline üles lukõ, tuud om maailmadu pall’u, aga olkõ siihn nimetet egasugumatsõ batuudi, zorb-palli, eesli ja hobõsõga ratsutamine ja näomaalmine. Sai kodujänese pojakõisile pai tetä ja kaia, meda mõistva tetä koolitõt pini. Alma firmal jagusi paarilõsaalõ latsõlõ illus ja pehme mänguliblik ja kohukõnõ. Õnnõloosi jaos, konh ega pileti iist määntsegi auhinna sai, olli toetaja vai moodsan keelen sponsori andunu pall’u tarvilikkõ ja ka kallid asju: jopõsid, kõrvaklappõ, kinkekaartõ, mänguasju ja magusat. Ummi perekondõ käsitüümeistri olli ka vääga armsa näoga puppõ heegeldänu ja mõnõst majapedämisest jagusi istutamises taimi. Loosi päävõit oll’ Mäe-Kolga talu basseinipidu kinkekaart.

Kohaliku päästekomando mehe näüti järve veeren, kuis sääl mürräten ja tsukõldõn hennest mõistlikult ülhen petä ja meda tetä sis, kui kiäki hättä jääs.

Rõõmurullõ noorõ imä tennäse söämest nii ummi peresiid ku asutuisi-ettevõttõid, kiä latsi vasta nii lahkõ olli. Kuis latsi pidupäivä tulõva aasta viil parembadõ kõrralda, tuu pääle nakasõ Rõõmurulli aigsõst mõtlõma.

Nõlvaku Kaie

Noorõ imä ja näide pesämuna tandsva piduliisile. Schneideri Keidy pilt