Minevä pühäpäävä oll’ Navi rahvamaja saal täüs inemiisi, kiä tundva rõõmu seltskunnalaulõst. Peeti Võro maakunna seltskunnalaulu päivä, kon 120 ossavõtjat lauli ütenkuun pillimängjidega tunnõtuid rahvalikkõ laulõ, vahepääle sai kaia tiatritükkü ja tandsu.

«Ku ma seltskunnalaulu pääle mõtlõ, sis mullõ paistus, et seo om asi, miä köüt inemiisi kokko nii põlvkundõ seen ku põlvkundõ vaihõl. Taa tuu kokko täämbä täpsele säändse seltskunna, kiä naid laulõ tiid, tund ja mõist üten laulda. Näütüses ma kül tulõ säändsest perekunnast, kon neo laulu omma tihtsäle kõlanu ja kõlasõ edesi kah. Seo om kinä kommõ, midä umilõ latsilõ ja latsõlatsilõ edesi anda,» ütel’ päävä juht, Navi küläseldsi vidäjä Timmi Mai päävä vallalõtegemisel.

Päävä kavan oll’ Lasva näütetrupi etendüs «Pensionärid tööle», ütine lõunõsüük, kontsõrt esitegijilt, hulga ütist laulmist ja laulmisõ vahepääle tandsmist ja tandsuütisüisi ülesastmiisi.

Pääväst olli ossa võtma tulnu Navi laulunaasõ, Võro pensionääre pääväkeskusõ seltskunnalaulutsõõr, seenioritandsutsõõr Hõbevalge, tandsurühm Lasva Tatsujad, tandsurühm «Ei me ette tea» Järva-Jaanist, seltskunnalaulja Põlgastõst, tandsurühm Rüärääk, seenioritandsurühm Ummamuudu ja tõõsõki külälise. Paiga pääl olli viil lõõtspillimängjä Ojasaarõ Toomasõ iistvidämisel. Et kõigil kõik laulu pään ei olõ, näüdäti sõnnu saina pääle.

«Om hää miil, et inemise tahtva laulda, löüdvä ao ja põhjusõ kokko tulla. Om uhkõ tunnõ, et täämbä om siiä tulnu nii hulga ossavõtjit,» ütel’ Timmi Mai.

Seltskunnalaulupäävä tegemiisi iistvõtja olli Navi laulunaasõ üten Hurda Astridiga, kiä om säändside laulupäivi kõrraldamisõ man olnu alostusõst pääle. Päävä kõrraldaja olli Navi küläselts ja Võro valla kultuuri- ja nuursuutüükeskus.

Rahmani Jan

Laulupäävä vallalõlaulminõ. Rahmani Jani pilt