Minevä nädälivaihtus peeti Mehikuurman katõpääväst foorumit, kon otsiti vastust küsümüsele, kuis om elo veeremaal püsümä jäänü ja määne võinu olla Mehikuurma kogokunna tulõvik.
Foorumi käügin saadi tutvas Mehikuurmaga ja üles asti tõisi kogokundõ esindäjä kah. Ütenkuun otsiti «kuldvõtmõkõist», kuis meelütä nuuri perrit maalõ elämä. Arotõdi, määndsen olokõrran omma kogokunna täämbä ja määne võinu olla näide roll tulõvigun.
Kogokunnafoorumi kõrraldaja Aalja Toivo Mehikuurma arõngu seltsist ütel’, et päämine tarkus, miä jutõst vällä tull’, om tuu, et lahkus ja usaldus omma võtmõ tulõvahe aigu. «Elojaatav suhtuminõ, egäpääväne lahkus ja usaldus omma kogokunna arõngun ja vahtsidõ inemiisi ütenhaardmisõ man tähtsämbä ku ütski riiklik programm,» võtt’ tä foorumil kõnõldu tulõmi kokko.
Tsipa linnukamb mõtõ käüti kah vällä: Mehikuurma muudu väiku kogokunna võinu olla muulõ ilmalõ iinkujos ja tulõvigu elovorm.
Rahmani Jan
Kogokunnafoorumi üts osa oll’ Mehikuurma külä pääl ümbrekaeminõ ja külä aoluu ja täämbädse pääväga ligembält tutvas saaminõ. Pildi pääl om osa rahvast Kalla Urmassõ iistvidämisel järve viirde puulsalahastõ randa jõudnu. Rahmani Jani pilt
