Seol nimel om Eestin 30 kandjat. Samast suguvõsast peri nimel Taros om kandjit tsipa rohkõmb ku 10, nimel Tarus kah rohkõmb ku 10.
Nimi panti õnnõ üten paigan. Seo oll’ Arula mõisa Otõmpää kihlkunnan, nime saaja olli Kuurvere Tootsi Henu (Henno) ja timä latsi perekunna. Nimme kirutõdi algusõn selgele üte r-iga: Otõmpää personaalraamatun 1813–1835 Taros, hingelugõmisõn 1826 Taras. Perrätulõjidõ vällärändämisel Räpinä ja ildamba Vahtsõliina kihlkunda naati nimme kirotama Tarros. Minkast seo tull’, olõ-i selge. Otõpäält 1894 annõt kerigutäht om nimekujuga Taros ja ka ildamba tulõ tuud nimekirotust ette, a vahtsõn elupaigan sai päämädses iks Tarros. Või-olla oll’ tegemist arvamisõga, et nimi om vahtsõdõ kiräviisi ümbre pant ja vanan kiräviien tulõssi tuu reeglide perrä kiruta katõkõrdnõ –r? Vai sõski nimekandja esi ütlivä [tarros]?
Nii vai tõistõ, 1820. aastil, ku nimi panti, olõssi kiräpilti Taros iks tulnu lukõ õnnõ vana kiräviie reeglide perrä, tuu tähendäs pikä a-ga: [taaros]. Midä sääne nimi võisõ tähendä? Hää vastus om Lõuna-Eestin levinü vinne lainsõna taarast, minkast võisõ kergele löüdüdä ka kujju taarost. Tähendüs om ’kogokunna- vai külävanõmb, kerikuvanõmb, vallakäskjalg, kohtutiindre jm’. Alussõs om vinne ста́роста ’vanõmb, külävanõmb, vüürmündri‘.
Tõnõ võimalus, et priinimi tulõ vinne edenimest Tarass om veidemb usutav. Sõs om rassõ seletä, mille iks tõsõn silbin –o naati kirotama. Näütüses Jõgeva mõisa (Laiusõ) Tarras või olla edenimest saad. Tuuvasta Taevere mõisa (Suurõ-Jaani) Starast om saad kimmäle samast vinne lainsõnast ста́роста.
Nime saanu Henu (Henno, Enno) man jääs silmä, et 1826 es olõ tä inämb üten leibkunnan uma viimädse naasõ Eevaga, oll’ hingelugõmisõn kirän ku vallasant. Tõnõ huvitav kotus om Henu latsõpõlvõn: tä esä Vaela Tootsi pere om elänü Tartu liinan, inne ku esäst sai Kuurvere talu sulanõ. Võimalik, et minkastki säändsest sai pere vinneperädse lisanime. Sõski om ka võimalik, et lisanimme es olõki ja Taros tulõtõdi ku sarjanimi kuun tõsõ Arulan pantu priinimega Possul (52 kandjat), vrd vinne посол ‚saadik‘.
Saarõ Evar
Rubriigin kõnõldas perekunnanimmi periolõmisõst ja tähendüsest.
