Ütismeediäplatvormin Facebook om rühmän «Võro kiil» joba päält 10 000 huvilidsõ.

«Huvi Näoviho võro keele rühmä vasta näütäs muidoki huvvi võro keele vasta,» seletäs rühmä vidäjä Jüvä Sullõv. Viil om rühmä suur nummõr timä meelest märk tuust, et seo ilma aigu eläse pall’o võrokõsõ ja võro keele huvilidsõ suurõ jao umast elost ütismeediän.

Jüvä Sullõv om tähele pandnu, et suurõs om võro keele rühm kasunu teno võrokiilsile meemele, nal’apiltele, miä omma üle ilma moodun. Tä löüd, et kammandaminõ säändse suurõ rühmäga ei olõki väega rassõ, selle et tego om süämele lähkü teemaga, midä hää vabal aol tõsitsõmpi töie vaihõl tetä. Päälegi andva ütismeediän kõik, kiä sääl midägi tegevä, ütitsehe asja uma pannusõ.

Üts küländ teküs rühmän ütenlüüjä om Mürgü Marje Krabi kandist. Midä timä säält rühmäst löüd ja midä sinnä kirotas? «Võro keele grupist lövvä põnõvid asju, näütüses artikli tuu kotsilõ, et võru kiil om iks erälde kiil, mitte murrõ. Häid ütlemiisi, juttõ vanast aost. Esi saada sinnä nall’u ja elun juhtunuid põnõvid asju, et tõisil kah midägi naarda ollu. Seol hädälidsel aol võinu jo mõni asi suu naarulõ kisku.»

Rahmani Jan

Näoviho-rühmä «Võro kiil» kaasõpilt. Luiga Kristjani kokkosäet pilt