Võro instituut and ütenkuun Vana-Võromaa umavalitsuisiga 2012. aastagast pääle vällä Hindätiidmise avvohinda, minka kitetäs nii pikäaolist tüüd võro keele ja meele püsümise hääs ku ka vahtsit ettevõtmiisi uma hoitmisõ tsihin.
Kuvvõndat kõrda vällä antava Hindätiidmise avvohinna saava Võro latsiaid Sõleke, Põlva Jakobi Kuul, folklooriandsambli Käokirjas ja Orioni Jana, kiä om võrokiilse kohvitarõ kõrraldaja Tal’nan Kadrioro raamadukogon.
Avvohinnas omma Margna Epu tettü kitmiskirä, Roosma Anu meisterdedü keelepesätsirgu ja tsihtotstarbõga avvohinnaraha rahvakultuuri keskusõ Vana-Võromaa perimüskultuuri programmist.
Avvohinna saaja omma oodõdu imäkeelepääväl (14.03) Sõlekese latsiaida pidolidsõlõ kokkosaamisõlõ, kon üteliidsi andas üle võro keele iistkõnõlõja ammõt – taa lätt Tootsi Tiidu käest Jansonsi Silvile.
UL
Kunstnik Roosma Anu tettü keelepesätsirgu. Roosma Anu pilt
