Võro liinapäivil sai puulpäävä õdagu keskplatsi pääl nätä vahtsõt võrokeelist muusigavideot «Ummamuudu maa», minka võro keele iistkõnõlõja ammõtit pidänü Kaha Kaido pruuv Vanna Võromaad ütte köütä. Põimukuu pümme taiva all helkävide tsõõrõ ala kogunõnu rahvas tervüt’ muuvi edimäst ettekandmist huugsa kässiplaksutamisõga.

Kaha sõnnu perrä sattõ luu seeme mulda sis, ku tä andsõ võro keele iistkõnõlõja ammõtin ollõn lubahusõ: «Ma kõrralda üte lihtsä luu, midä passis laulda nii latsõl ku vanainemisel.» Sõna tekk’ Antoni Annika, kiä om Kaha muusikaliidsilõ ütisüisile varrambagi tekstiapi andnu. Sõnnu pääle säädse viie Jõgi Riivo.

«Sai valmis illos lugu, a vot Teppo lõõdsa pääl es nakka seo kuigi tüüle,» selet’ Kaha Kaido luumisõga köüdetüist hädäkeisist. Sis tekk’ muusigameistre viie keerolidsõmbas ja estraadilikumbas ja kõik läts’ paika. Laulu sääde om kah Jõgi Riivo tettü.

Luku laulva katõssa solisti mitmõlt puult Vanalt Võromaalt – Rahmani Elo, Kattai Kaari, Oja Kaidi, Otsari Hellika, Leisi Meelis, Hainsoo Meelis, Ojasaarõ Toomas ja Kaha Kaido esi – ja Põlva muusigakooli tütarlatsiansambli DeViis. Saatõansamblin tegevä üten Jõgi Riivo, Änilase Piitre, Säde Janek ja Eliste Kaupo.

Põnnõv om kaia ka video pildikiilt: sinnä om poimit pääväpaistõliidsi kaehuisi kuvvõst Vana-Võromaa kihlkunnast. Helle ja hää tundõ luuminõ oll’ Kaha sõnnu perrä video ülesvõtmisõl üts tsihte. «Tahtsõ tetä hää tujo laulu täämbädse päävä Võromaast,» ütel’ tä. Ja seo om kõrda kah lännü. Nüüd luut tä viil õnnõ tuud, et rahvas laulu umas võtt ja järgmäne kõrd joba üten laul.

Luku saa kaia ja milles mitte ka üten laulma oppi Youtube’i platvormi pääl.

Kabuna Kaile

Luku saa kaia: https://youtu.be/acUm-ERrMTU

Rahmani Jani pilt