Täämbä om pärtlipäiv. Pühä Bartolomeusõ nimest om tulnu hulga egasugumaidsi edenimmi ja noist umakõrda priinimmi, näütüses Pärtel (465), Pertel (115), Pertelson (40), Pärtlas (8), Meos (259), Meus (94) jt, lisas om tuu viil alussõs osalõ nimmist Pärt ja Pert.
Üts tävveste eriline lisanimi, miä või olla Bartolomeusõ nimest saad, om Räpinä kandi Tolmo. Tuust saaduist priinimmist om kõgõ parõmbidõ levinü Tolmusk, minkal om Eestin 53 kandjat. Nimi Tolmusk panti Räpinä mõisan Tolmo Juhani perrele Orava-Rõsna külän ja Tolmo Peedo latsilõ Lokuta külän. Peri olli nä Orava-Rõsnalt (täämbäne Kassilaanõ).
Tõnõ Tolmo lisanimest saad nimi om Leevaka külän pant Tolmow, mink täämbädse päävä kuju omma Tolmov (7) ja Tolmoff (6). Nime saajat Tolmo Jakobit kutsuti 1816. aastaga paiku Kirbu Jakob (mõisa- ja kõrvalnimi Kirbo), nii om pastor Heller personaalraamatulõ kirja pandnu. Sama lisanimi eläs edesi ka 200 aastakka ildamb. Egä Räpinä miis, kiä om Tolmov, om «külänime» perrä Kirp.
Lisanime vanõmb kuju oll’ Tolma, näütüses 1731 Miilva külän Weiko Tollma Jahn ja Tolma Thomas. Nimel või olla määnegi seos Toolamaa külänimega (külä joba 1582), a tuu olõ-i peris selge. Küll om selge seos vanavinne inemisenimega Tolma (То́лма). Vinne Tolma nimest ummakõrda ei teedä häste, kost tä tulõ. Kiuršunova Irina om paknu sõnna tolmit’, miä tähendäs ’korrutama’ vai ’vasta ajama’. Köüdüs türgi keele taustaga sõna vai nimega tolmatš, miä tähendäs tõlki, om jo kah võimalik.
Või-olla, et õigõ võtmõ and Soomõ perekunnanimmi raamat, kon näüdätäs är, et Tolmo vai Tolmu Jämsä kandin (priinimi Tolmunen) võissi olla mugandus Bartolomeusõst.
Nimi Bartolomeus tähendäs aramea ja heebreä keelin Bar-Tholmai, Talmai poig. Kas vanavinne nimi Tolma, minkast om peris usutavalt saad Räpinä Tolmo, võissi olla saanu õkva mõotusõ aramea-heebreä inemisenime kujust, tuud om muiduki rassõ näüdädä. Sõski või Tolmo olla ka lihtsalõ keskmäne osa nimest Bartolomeus, nigu iks nime lühenese – kõrd lõpust, kõrd alustusõst, kõrd mõlõmbast otsast.
Saarõ Evar
Rubriigin kõnõldas perekunnanimmi periolõmisõst ja tähendüsest.
