Orava kooli vilistläisi uma pido

Orava kuul pidi timahava 23. süküskuu pääväl juubõlisünnüpäivä.

Et kuul om olnu mitmõh kotusõh, alas’ sünnüpäiv mälehtüshetkega Hanikasõh, koh oll’ vana koolimaja. Osa majast om maaha lahutu ja 2007. aastast om sääl Hanikasõ küläkeskus. Sinnä om katskümmend aastat tagasi pantu mälehtüskivi.

Mälehtüskivi man panti palama kündle mi siäst manalatiile lännüile opilaisilõ, oppajilõ, tüütäjile. Nigu iks laulti «Om pähnäpuie häitsemise aig». Seokõrd lauli vilistläse Vaheri Kätlin ni Lumõ Aigar ja Kalmer. 55 aastat tagasi lõpõtanu Lilli Merike kõnõl’ umast kooliaost ja Ravva Ervin (Raud) võtsõ iist kooli laulu «Hanikase kooli hääl».

Kontsõrt-aktus sündü Oravil kooli võimlah. Et koolih om seo opiaasta õnnõ 20 opilast, ollimi keväjä murõh, kuimuudu kava kokko panda. Kutsimi vilistläisi esinemä, a suvõl es olõ huviliidsi. Põimukuul pässi nigu paisu takast ja kõrrast inämb vilistläisi tull’ pruuvõhe. Viimätsel nädälil sai laulukuur kah kokko. Suurõs iistvidäjäs oll’ koorijuht Kätlin. Tandsurühmä panni kokko Mällo Aile ja Keerpalu Elina. Kõgõ suurõmb teno Keerdi Katariinalõ, kiä härgüt’ noorõmbit vilistläisi esinemä tulõma.

Lõpus tull’ kokko pääle paarisaa inemise. Võro vallavalitsusõ nimel kõnõl’ vallavanõmb Puusepä Kalmer. Erilidse olli esi põlvkundõ vilistläisi sõnavõto. Kõgõpäält kõnõli 1967. aastal lõpõtanu Jansonsi Silvi ni 1988. aastal lõpõtanu Lumõ Neeme. Silvi tulõt’ vanno oppajit miilde. Lumõ Neeme kõnõl’, kuis timä sai põhikoolist nii kimmä põh’a, et pässi noidõ tiidmiisiga ülikuuli. Tootsi Marko alost’ koolitiid viil vanah majah, a lõpõt’ 2002. aastal jo Orava majah. Ni kõgõ noorõmb kõnõlõja oll’ 2011. aastal lõpõtanu Naela Keiry.

Pido jakku Orava kooli võimlah pia hummokuni. Osa varramba lõpõtanuid istsõ õdaku Hanikasõ küläkeskusõh. Nii oll’ kõigil uma ja hää pido.

Säinasti Ene

Vanõmbidõ vilistläisi tandsurühm, kiä tandsõva «Kas vana arm ka roostetab». Rauga Arturi pilt