Nimel Kool om Eestin 374 kandjat. Jaanuarin 2017 oll’ näid viil 405, nii et om olnu nime kahanõmisõ aig (ülekaalun ärkuulminõ, nime vahetus abielun), minkalõ hariligult tulõ otsa nime kasumisõ aig (rohkõmb sündümist). Nimel Kohl, midä Koolist lahuta saa-ai, om 16 kandjat.
Ku priinimmi panti, sõs hingelugõmiisi ja perekunnanimmi pandmisõ raamatidõ perrä panti tervelt 19 mõisan saksa kiräpildiga nimi Kohl [kool]. Katsan mõisan panti Kool, üten Kol ja üten Kooll. Tegemist om tüüpilidselt tartumaaliku nimega, sääl panti tedä 12 mõisan. Kohlist om inämbäste iks saanuki Kool, näütüses aokiränik Kooli Oti suguvõsan Virumaal Aasperen. Priinimi Kooli om kah muiduki olõman, 26 kandjat. Panti kolmõn mõisan algkujul Koli ja üten Kohli, a või olla saad ka mõnõst nimetävän käänüssen pantust nimest.
Võru keele helüvaheldust sõnan kuul : kooli tuuaolinõ kiräviis es märgi.
Võrumaal panti Kool nimes katõn kotussõn. Jo 1809 pand’ Kanepi praavusk Roth Koorastõ mõisa Kivi talun nime Kool. 1817 levisi seo nimi ka Kaagri mõisalõ. Koorastõ nimi om selgele motiveerit, selle et Kivi Saamuel oll’ olnu mõisavalla edimäne kuulmeistre ja nime saaja olliki timä poja ummi perridega. Näist Kivi Rein oll’ kuulmeistre ka 1809. aastagal. Mõnistõ mõisan panti Kool Kilvagu talu sant-kodapoolidsõ Miku perrele, a tuu nimi kuuli 19. aastagasaa joosul vällä.
Mitmal puul pantul priinimel või olla kooli tähendüs ka sõs, ku tuud kirutõdi saksa muudu Kohl. Viil omma teoreetilidselt võimaliku eesti ja lõunaeesti keele tähenduse kuul : koolu ku jõõ kõvvõr osa ehk jõõkuul vai kuul : koolu ku ärkuulminõ, näütüses ütlemisen koolu aig.
Ku priinimme andõn mõtõldi saksa keelen, sõs om sõnal Kohl muiduki tähendüs ’kapstas’. Ka sõna Kohle ’hüdsi’ või olla nimes vormunu kujul Kohl, sõs või tuu olla hüdsepalutaja ammõtiga köüdet.
Eestistämisel panti Kool keelunimekirjä joba 1934. aastagal, et liiga hulga kandjit. Sõski om toimunu üts muutminõ, kon perekunnanime Koll asõmalõ võeti Kool. Nime Kohl eestistäjit om olnu õnnõ üts pere, nimä omma võtnu vahtsõ nime Koha.
Saarõ Evar
Rubriigin kõnõldas perekunnanimmi periolõmisõst ja tähendüsest.
