Lehekuu perämädsel nädälil tei Võro gümnaasiumi 10. klassi läbi mi kandi umakultuuriga tutvassaamisõ kursusõ «Mina, minu juured ja Võrumaa». Kõnõldi Võromaast laembalõ, keelest, kultuurist ja perimüsest, luudusõst, ettevõtlusõst ja tulõvigunägemiisist.
«Paikkundligu hindätiidmisega köüdedü tegemise omma mi kooli arõngukavan kirän ja meil om tsiht, et tarvitami umakultuuriga köüdetüt opitüün,» kõnõl’ kursusõ kõrraldaja, Võro gümnaasiumi opijuht Hindriksoni Annely.
Võromaa-kursust valmistõdi ette pikkä aigu. Kõgõpäält peeti nõvvo uma kooli oppajidõ ja opilaisiga ja ku nuu mõttõ kokko olli kor’adu, kutsuti mano Valsi Kristi ja Valgu Meel Võromaa arõnduskeskusõst, kiä uman egäpäävätsen tüün mi kandi umakultuuriga tegelese. Ütenkuun löüti kursusõlõ esinejä, kiä opilaisilõ ummi tiidmiisi ja kogõmuisi kõnõlnu.
Kokko sai hulk rahvast, kiä olli valmis gümnasiste oppama. Teemadõ vallaseletäjä olli Laanõ Triinu, Saarõ Hipp, Sepä Tuul, Vene Diana, Hummali Aavo, Siska Vaido, Andresoni Sigre, Gomozova Anþelika ja Tootsi Tiit. Lisas jutusti umma luku viil hulga tunnõtuid inspiratsiooniesinejit: Randvere Johan, Mõttusõ Mirjam, Hintsi Anna, Kuurmaa Lenna ja Mäesepä Lauri, Kalkuna Mari. Päält noidõ tekk’ gümnasistega tüüd viil hulga tüütarri ja ekskursioonõ läbiviijit, nii oll’ oppamisõga köüdet ligi 40 inemist.
Hindriksoni Annely sõnnu perrä tulli esinejä gümnaasiumi plaaniga häste üten. «Uutmalda kombõl löüdsevä esiki riikevaihõlidsõlt tuuritava artisti seo ao ja tuu tegi süäme lämmäs,» kitt’ tä.
Kursusõ perämädsel pääväl tei opilasõ ka välläsõitõ esi paikulõ, näütüses Hinni kanjonilõ Rõugõn ja Karulalõ, käüti ka Võhandu jõõ pääl kanuuga sõitman.
Egä päävä lõpun panni opilasõ kirja kokkovõttõ. «Olõmi aasta joosul juhatanu opilaisi ummilõ tegemiisile mõtõt andma ja naa kokkovõttõ anni meile kinnitüst, et aastanõ tüü om vilja kandnu. Päält 80 opilasõ olli seo kursusõga haarõdu ja esi opilaisilõ miildü esi esinejä, panti tähele egäüte väärtüst, luku, sõnomit, midä edesi anti,» selet’ Hindriksoni Annely tuud, kuis opja kursusõ vasta võti.
Ka kõrraldaja esi jäi kursusõga rahulõ. «Seo oll’ väega suur projekt ja või üteldä, et taa täütse umma tsihti: opilasõ mõtli nädäli joosul Võromaalõ ja timä väärtüisile. Ja seo kursus om meil opikavan seen, miä tähendäs, et taa ei jää ütekõrdsõs, a om tulnu, et jäiä,» kõnõl’ Hindriksoni Annely ka tulõviguplaanõ.
Rahmani Jan
Võro gümnaasiumi opijuht ja umakultuurikursusõ kõrraldaja Hindriksoni Annely. Rahmani Jani pilt
