1. piimäkuu pääväl 2024. aastagal Indsikurmun peetü võrokeeline laulu- ja rahvapido Uma Pido oll’ kimmäs võro kultuurielo tugõvambas tegijä. Kokko tulli võro keeli laulva koori ja tuhandõ kullõja üle Eesti, kinkal oll’ ütine suuv lämmän meeleolun müüdä saata üts õdak võro kultuuri seen. Esinejide hulgan oll’ 3800 suurt ja väikut lauljat, tandsupundi Põlva Päntajalad, Hopser ja Veriora Vingerdi, solisti Kalkuna Mari, Hainsoo Meelika, Hainsoo Meelis, Contra, Mureli Hilje, Mähari Andres ja tõsõ. Muusikat tei orkestri Jõgi Riivo iistvõtmisõl ja Karmid Torud. Laulõ emotsioonõ tei tugõvambas lavastaja Leesalu Diana, kunstnigu Unduski Marion ja Miksoni Martin, liikmisjuht Jõela Ingmar, pupilavastaja Tõnissoni Taavi ja muusikalinõ kujondaja Varrese Ardo Ran.

Kontsõrt sai alostusõ pidotulõ palama pandmisõga «Tulõlaulu» saatõl. Tuu käügin tulli lava pääle segäkoori ja alosti pito süämligu tooniga laulõ «Laul sulama pand jää» ja «Kas om viil ilman ilosambat paika» esitämisega. Mullõ jäi kõgõ inämb miilde lugu «Jäämi alalõ», minkalõ anni pall’o mano ka tandsja, kink emotsioonõ oll’ põnnõv kaia. Sammamuudu tulõ kittä lavakujondaja ja koreograafi loomingulisust, kiä sai toimõ koreograafia laulõga poimmisõga, nii et tekkü loogilinõ lugu, miä kandu edesi järgmädsele laululõ. Niisamatõ oll’ põnnõv kaia laulu «Sõudkõ, käe, sõudkõ, jala!» esitüst: tandsja tarviti valgõt kangast, minka nä tei perrä lainit ja kesk samma linamerd oiu ütsik plangõst tett purjõlaiv.

Pido kõgõ üllätävämb kotus oll’ sis, ku naas’ kostuma dramaatilinõ trummimäng ja parmupill. Tuu salaperälidse mängo saatõs tulli puiõ alt vällä suurõ pupi, miä anni uma liikmisõga vägevä näo laululõ «Ma nakka puus». Nimmamalda saa-i jättä ka tunnõtut luku «Kõnõtraat», midä rahvas süämest üten laul’. Luu mano oll’ pantu muudsa kitarrisoolo, miä and’ laululõ silmäpaistuva vahtsõndusõ. Vahenumbrõ, nigu näütüses «Siimani seeli», täüdi är kuurõ vaihtusõ, tuuperäst läts’ pido üte huuga edesi. Pido lõpõt’ kõigi esinejide kogonõminõ laulukaarõ ala laulu «Mino maa» esitüses, mink hüväste jätvä tuun juhat’ rahvast kodotii pääle.

2024. aastaga Uma Pido oll’ võimsa ja jääs miilde. Esitüisi man mõiu umaperäline lavastus ja vahtsõ laulu, a ka vanõmba laulu, miä olli vahtsõ kuvvõ saanu. Uma Pido avit’ tuhandil inemiisil müüdä saata üte kododsõ õdagu üten ilosan Eestimaa paigan, üteliidsi peränden tulõvilõ põlvilõ võro kultuuri.

Raudketi Merilin
Põlva gümnaasium
10.c klass

Uma Pido 2024. Suurõ pupi omma elolõ heränü ja latsikuur laul takan laulu «Ma nakka puus». Sundelli Harri pilt