Võro instituudi sügüsedsel konvõrendsil päälkiräga «Iist muusõum, seest gümnaasium» kõnõldi vallalõ muusõummõ ja muusõumiharidusõga köüdetüt.

Konvõrents oll’ 12. rehekuul Karilatsi vabaõhumuusõumin. Ettekandidõga asti üles Raisma Mariann Tarto ülikooli muusõumist, Parhomenko Aadi Tarto ülikoolist, Malahovskisõ Vladislavs Latgale tehnoloogiaakadeemiäst, Tuubeli Virve Eesti rahva muusõumist, Marienhageni Merily Eesti suurõtiimuusõumist, Visnapuu Kaja Tal’na ülikoolist, Maueri Peeter muinsuskaitsõammõtist ja Kiho Toomas aokiräst Akadeemiä, sainaettekandõ tekk’ Visseli Agu Võro seltsist. Päält ettekandidõ arotõdi tuud, määne om hää muusõum 21. aastasaal.

Konvõrendsi kõrraldaja Saarõ Evar selet’, et konvõrendsipääväga prooviti selgembäs saia, kuis esieränis paigapäälidse muusõumi saava olla rahva poolõ pööret ja rohkõmb umakandi kultuuri, aoluku ja kiilt näüdädä. Nii kõnõli mitmõ muusõumias’atundja, kuis muusõumi omma aoluun muutunu ja kuis rohkõmb rahvani jõuda.
Paigapäälitside muusõummõ rollist umakultuuri näütämise ja oppamisõ man and’ kõgõ esierälidsemba ülekaehusõ Latgale muusõumi tüütäjä Malahovskisõ Vladislavs, kiä kõnõl’, kuimuudu latgalis olõmist ja latgale kiilt Lätin tundas ja kuimuudu tuud Latgale muusõumin edesi antas. «Või üteldä, et meil om naidõ käest oppi. Latgalen om nii, et midä väikumb muusõum, toda rohkõmb nä tahtva latgale kiilt näüdätä,» ütel’ Saarõ Evar.

Päävä kokkovõtva ettekandõ tekk’ aokirä Akadeemiä päätoimõndaja Kiho Toomas, kiä om laembalõ Eesti ao- ja kultuuriluu mõttõandja. Timä kõnõl’, et ku häste omma teedä Eesti opilaisi hää tulõmusõ Pisa testin, sis ka Eesti muusõumi omma maailmatasõmõl ja saava suuri avvohindu. Lisas toolõ om meil säändsit kogosid, miä omma maailman ainulidsõ, näütüses rahvaluulõkogo kirändüsmuusõumin.

Konvõrendsipäävä päälkirä pääle märken löüdse Kiho Toomas, et ku kuul and haridust inemisele, sis muusõum and haridust tervele rahvalõ. «Kõik mäloasotusõ, muusõumi, arhiivi, raamadukogo omma rahva mälehtüisi hoitja. Ku rahval om meelenpidämine, om olõman hindätiidvüs, alus, kohe pääle hinnäst tukõ ja kost edesi minnä,» selet’ tä.

Kiho meelest om muusõummõ päämine ülesannõ vannavarra ja tuuga köüdetüt teedüst hoita ja kor’ada. «Muusõum ei saa uman tüün hindo alla laskõ, olla rekvisiidiladu ja tetä etendüisi müüdäminnen kaemisõs,» selet’ Kiho Toomas.

Rahmani Jan

Kiho Toomas pidä konvõrendsipäivä kokko võtvat ettekannõt. Rahmani Jani pilt