Kutsumi nuuri ni vanno ossa võtma tõlkmisvõistlusõst, koh egälütel tulõ võro kiilde ümbre panda kolm tsill’okõist, a häste esimuudu eestikeelist teksti.
Mille mi toda teemi? Õks tuujaos, et ümbrepandmisõ kunst inemiisi pääh kah alalõ püsünü ja et Vana-Võromaa esi kotussidõ keelepruuk saanu kirja pant.
Teksti omma kõigilõ sama. Ümbre võit panda kõik kolm teksti vai valli õnnõ üte vai kats teksti. Karga Võro instituudi kodolehe pääle, otsi teksti vällä ja panõ ümbre – õkva nii, nigu su meelest õigõ om. Ku tüü är saadat, sis märgi är uma nimi, vannus ja tuu, kostkotsilt ja kink suust su võro kiil peri om (külä, kotus, inemise, oppusõ, raamadu, lemmigu jne).
Aigu ümbrepandmisõ jaos om veidü – valmis tüü piät olõma Uguri Kadri postkastin kadri.ugur@wi.ee kõgõ ildamba 31. rehekuu pääväl kell 23.59. Parõmbidõ töie vällähõikaminõ om plaanit 7. märdikuul kell 18 Räpinä luumismajan. Säälsaman om ka Laanõ Triinu vahtsõ latsiraamadu vällänäütämine. Ümbrepandmisõ võistlusõ osaliidsile om tuu raamat joba tutva, selle et üts tõlkmisõs mõtõld tekstijupp omgi tuust vagivahtsõst raamatust.
Võro Instituut
