Timahavvanõ mihklipääva pidämine Paidra küläh Oinamäel trehväs’ peris õigõlõ kuupääväle, 29. süküskuulõ. Päiv külh paistu, a tuulõkõnõ olle tsipa villõ. Kuah tetti tuld ja sääl sai hinnäst tuulõvar’oh lämmistä.

Egälütel oll’ midägi hüvväparõmbat süümises üteh võet: Kairel lämmi tsäi, Rael-Adiinal värvilidse kanamuna, suur kandikutäüs tikuvõiuleibo ja poodist peri kraami oll’ kah. Ma võti umakasvatõdut arbuusi, a läts’ nihu, et sai kasumisõ päält võetus: makõ külh joba olle, a hainamaik iks kah viil man.

Nunnuvõistlusõ peimi kah. Tuu man oll’ kõgõ suurõmp vikur Lainõ tuudu suurõ kürvidsä autost välläsaaminõ, kaalu är arvaminõ ja perän kaalminõ. Lainõ olle tääga Vahtsõliinah laaduh käünü ja avvohinnagi saanu, a kaalmada tä oll’. Võti rippkaalu tuuperäst üteh, tõõsõ mehe ja kangiga nõstimi vaiba seen kürvidsä rippu. Kaal näüdäs’ 61 killo ja Lainõ sai tuuga Oinamäelt nunnuvõistlusõ edimädse kotussõ.

Tõnõ kotus anti Rael-Adiinalõ, timä oll’ toonu päält katõmiitredse rebäsehanna, arbuusi ja kaalult tõsõ kürvidsä, miä oll’ 53 killo. Krislin Isandra saiõ ubinist, piprakaunast, siinist, marjost ja esisugumadsõst samblõst tett kompositsiooniga kolmandas.

Illos sügüsene pääväkene oll’.

Orassoni Elmet

Nunnuvõistlusõ avvohinnaliidsi kotussidõ saaja rivistõdi üles. Orassoni Elmeti pilt