2024. aastaga Kreutzwaldi mälehtüsmedäli sai kirändüsmuusõumi kultuuriluulidsõ arhiivi juhataja Metste Kristi ja 15 aastakka Võro instituudi uhjõ hoitnu Kuuba Rainer.
Metste Kristi hõigati nigu Kreutzwaldi mälehtüsmedäli saaja varrambagi vällä joulukuul Lauluesä sünnüaastapääväl. Tunnustusõ sai tä eesti kirändüse uurmisõ ja tunnõtus tegemise iist.
Kreutzwaldi muusõum om 2015. aastagast üts Võro instituudi allasotuisi. Ku Metste Kristile mälehtüsmedäli andmisõ käskkiräle kirot’ alla Kuuba Rainer, sis tä esi sai mälehtüsmedäli aasta alostusõn joba Võro instituudi vahtsõ juhi Padari Ivari käskkiräga. Kuubat kitetäs Lauluesä medäliga tuu iist, et tä om tugõnu Kreutzwaldi ello ja luumistüüd tutvas tegevä välläpanõgi vahtsõndamist ja trüküsõna välläandmist. Näütüses om timä takastoukamisõl vällä antu kolm jako eesti- ja võrokeelist pilteepost «Kalõvipoig». Tä om olnu tävvelidse «Kalõvipoja» eeposõ (2022) võro kiilde pandmisõ iistvõtja ja toimõndaja – kokkovõttõn Lauluesä võrokõsõlõ lähkümbäs tuuja.
Kabuna Kaile
Kuuba Rainer. Kabuna Kaile pilt
