Lavvamängo- ja savvusannahuviliidsilõ om hää uudis: valmis om saanu savvusanna lavvamäng. Majakujolidsõ karbi seen omma mängolaud, mängokaardi, nupi ja oppus.

«Seo om mäng, midä saa kõgõ parõmbidõ mängi kas kuun uma perre vai sõpruga. Või-olla omgi tä perrile kõgõ põnõvamb, sis saava latsõ küssü, kuis suidsusannan käümine iks om, ja vanõmba saava seletä, kuis sann tüütäs ja mille om nii, et ku är kütät, sis inämb ei tohe puid mano panda.»

Kavva tettü kinäkene

Mängo tegemine naas’ pääle 2021. aastal «Vunki mano!» luumisõtalossil. Mõttõ sääne mäng tetä käve vällä Laanõ Triinu ja talossil märgiti ütenkuun mõtõt täpsembäs. «Mõtlimi vällä, kellele ja mille jaos tuud mängo tahassi tetä. Põhilinõ põhjus oll’ UNESCO maailmaperändin olõvat savvusanna kuiki tähtsämbäs tetä. Et võissi olla midägi, miä avitas latsil ja nuuril noist kombist ossa saia,» kõnõlõs Piiri Helen.

Edimädse mängo prototüübi tekk’ kujondaja Oolbergi Taavi. «Pannimi kuun kirja kokkoleppe, kuis mäng käü. 2021. aasta lõpus oll’ asi kuun ja 2022. naksimi mängo mängjide pääl läbi pruuvma, et saia teedä, midä tulõssi muuta, midä parõmbas tetä. Avalikkõ läbimängmiisi oll’ kats-kolm tükkü, rohkõmb oll’ näid Võro instituudi tüütäjide, sõpru ja perrega. Aastaga sai neli-viis varjantsi tettüs, egä kõrd läts’ mäng veidükese parõmbas,» seletäs Piiri Helen luumisprotsessi.

Et tegemine vinnü pikäle, tull’ tuu man ette ka uutmalda muutuisi. «2023. aastagal pidimi otsma vahtsõ kujondaja, selle et Taavi es jõvva inämb üten lüvvä. Margna Epp oll’ väega nõun mängo är kujondama. Ku kujondus oll’ valmis, saistu mäng viil aastakõsõ ja nüüt om tä sis valmis!» om Piiri Helen rõõmsa.

Kuis tegemise vidäjä tulõmiga rahul om? «Ma olõ väega rahul. Kujondus om parõmb, ku ma mõistsõ ette kujota. Värvi ja tuu, kuis seo vällä näge, om nii sanna muudu ja nii ummamuudu.»

Teedüst savvusanna lavvamängu kotsilõ saa Võro instituudist. Egäsugumast savvusannaga köüdetüt teedüst om kodolehe savvusann.ee pääl.

Rahmani Jan

Savvusanna lavvamängu tegemise vidäjä Piiri Helen näütäs trükülämmind mängu. Rahmani Jani pilt

Savvusanna lavvamäng:

 
komplektin omma mängolaud,
86 mängokaarti ja 22 avvotasokaarti,
6 käüginuppi ja 1 Edevanõmba-nupp.

• Mängo vällätüütämise projektijuht: Piiri Helen
• Mõttõ autor: Laanõ Triinu
• Mõttõ edendüs: «Vunki mano!» mõttõtalossõ, Toomõ Triin, Rahmani Jan
• Mängo edimädse kujo luuja ja kunstnik edendüse man: Oolbergi Taavi
• Kunstnik ja kujondaja: Margna Epp

Välläandja: Võro instituut ja Võro selts VKKF
Tugõja: Eesti Rahvakultuuri Keskus, Eesti Kultuurkapital
Trükk ja kokkosäädmine: OÜ Just Print