Hummõnidsõl imäkeelepääväl, 14. urbõkuul hõigatas vällä timahavadsõ hindätiidmise avvohinna saaja. Võrokõsõs olõmisõ avvo seen pidämist tunnustõdas säitsmendät kõrda ja seokõrd säeti vällä katõsa kandidaati.

Üts hindätiidmise avvohinna nominent om Põlva kuul, kon joba 2016. aastagast om kõigin 3. klassõn võro keele tunn kah. Koolin omma jüvädse võro keele nädäli ja humanitaarklassilõ opatas Vana-Võromaa kultuuriluku. Viimätsil opiaastil om võro keele ja kultuuriga köüdetüid ettevõtmiisi koolin iist võtnu Ermeli Merili.

Kääpä kuul om paistnu silmä perimüskultuuri kuu pidämisega ja seost opiaastast tetäs 1.–5. klassi opilaisi lõimingupäivi seen tutvas võro keele ja kodoluuga. Kääpä kuul om ka üts partnõr riikevaihõlidsõn projektin «Latsõ ja umakultuur». Päält Kääpä kooli säeti avvohinna saajas ette koolijuht Hääle Kaire.

Haridusõ vallan omma hindätiidmisega silmä paistnu viil Väimälä latsiaiamaja keelepesärühm ja Lasva latsiaid Pargihaldjas. Väimälä latsiaiamaja om aastit nii väläsildi ku ka meele poolõst tunnõt ku kimmäs võro keele pesä. Esieränis kandva tuu iist huult keelepesärühmä oppaja Potteri Maivi ja Peedeli Piia. Lasva latsiaia puhul om vällä tuud, et egäpäävätegemiisi köüdetäs kõgõ perimüsega.

Mõnistõ muusõumi kotsilõ ütlese ettesäädjä, et pääle kavvõmba rahva om muusõum kimmäs võro kultuuri hoitja uma kogokunna jaos.

Avvohinna saajas omma ette säedü viil Pulga Jaan ku üts säsüni võro miis ja ansambli Kõhukesed, kelle mängovaran om pall’o võrokiilsit laulõ, säälhulgan Pulga Jaani luuduid.

Võro instituudi partnõri hindätiidmise avvohinna välläandmisõ man omma Võromaa arõnduskeskus ja Põlvamaa umavalitsuisi liit. Preemiäraha pand’ avvohinnä saajilõ vällä Eesti Rahvakultuuri Keskus.

Kabuna Kaile

Avvohinna mano käü Roosma Anu tett tsirgukujo.