Internetikeskkunnan petitsioon.ee kor’atas allkirju lõunõeesti keele säädüsega tunnustamisõs.
Petitsiooni omma kokko säädnü Seto kongressi vanõmbidõ kogo ja võrokõisi kongressi vanõmbidõ kogo, toolõ omma alla kirotanu päävanõmba Rahasepä Rainer ja Kauksi Ülle.
Petitsioonin sais ettepanõk tävvendä keelesäädüst nii, et sääl olnu kirän, et riik tugõ lõunõeesti keele kaitsmist, tarvitamist ja edendämist ja et lõunõeesti kiil, miä sais kuun mulgi, seto, tarto ja võro keelest, om Eesti põlinõ piirkunnakiil.
Päält tuu tetäs ettepanõk muuta keelesäädüse paragrahvi, kon omma üles loedu nuu keele, miä ei olõ Eestin võõrkeele, niimuudu: egä muu kiil pääle eesti keele, lõunõeesti keele ja eesti viipõkeele om võõrkiil.
Lisas om petitsioonin tettü ettepanõk panda rahvastiguregistri imäkeele valikvastussidõ hulka variandsi «lõunaeesti, võru», «lõunaeesti, seto», «lõunaeesti, mulgi» ja «lõunaeesti, tartu».
Petitsiooni saa kaia internetin aadrõsi petitsioon.ee/lounaeesti-piirkonnakeeled päält.
UL
