Jutus olli kiili ja kultuurõga köüdedü muutusõ, a niisamatõ muutusõ luuduskeskkunnan keelekogokundõ ümbre. Pääettekandõ pidi kliimafüüsik Posti Piia, kiä kõnõl’ kliima muutumisõst. Ernitsä Enn kõnõl’ vadjalaisist, Weberi Tobias Kraasna maarahvast, Bloklandi Rogier meä keelest. Pajusalu Karl, Balodisõ Uldis ja Ernštreitsi Valts olli kokko säädnü ettekandõ luudusnimmist õdagumeresoomõ paiganimmin Lätin ja Malahovskisõ Vladislavs kõnõl’ päält tõist ilmasõta vällä rännänüide latgalidõ hindätiidmisest.
Päävä tõnõ puul oll’ pühendet võro keelele. Saarõ Hipp tekk’ ettekandõ võro keelest Nõvvokogodõ ao koolin ja ütiskunnan. Rõõmusoksa Triin võtsõ kokko hindä ja Uguri Kadri uurmisõ, midä koolilatsõ ja oppaja arvasõ võro keele kotsilõ. Plado Helen ja Fastrõ Mariko kõnõli uma väiku uurmisõ perrä tollõst, midä uman keelen loetas.
Päiv lõppi välläandidõ näütämisega. Nätä sai vahtsõt Võro-Seto tähtraamatut ja Võro instituudi toimõndiisi kogomikku «Iist muusõum, seest gümnaasium».
Peris lõpõtusõs kiteti keväjä lõppõnu võrokeelidse romaani võistlusõ parõmbit ja anti kirotajilõ kätte tenotähe.
UL
Ettekandja Balodisõ Uldis ja Pajusalu Karl kõrraldaja Saarõ Evari küsümüst kullõman. Rahmani Jani pilt
Võrokiilse romaani võistlusõ võidutöie autori Laanõ Triinu ja Reimanni-Otsaru Nele. Rahmani Jani pilt
Võro instituudi inneskine direktri Kuuba Rainer ja parhillanõ juht Padari Ivari jutuhuun. Rahmani Jani pilt
Konnula Margus ja Jansonsi Silvi ettekandit kullõman. Rahmani Jani pilt
