Hoia, Jummal, Eestit!
Ma kuuli raadiost, et maailm om kõik pää pääle käänet. Midägi olõ-i inämb vannamuudu. Ku kolm aastat tagasi sai Ukrainah presidendis nall’amiis ja näütlejä, es tüki muu maailm tedä väega tõsitsõlõ võtma.
Parhilla om täst saanu üts kimmäs riigimiis, kiä näütäs nii mõnõlõgi Euruupah kotusõ kätte. Ja vastapite, ütest hindä meelest kõvast mehest om saanu nall’anummõr, kinka kiäki taha-i asju aia.
Nall’ast om asi muidoki kavvõh. Inemiisi surma üle naarda ei tohe. Tuugiperäst om hää miil, et eestläse omma jätnü uma väiku egäpäävämurrõ kõrvalõ ja avitasõ noid, kiä omma periselt hädäh. Annas Jummal, et mi näemi hätä õnnõ televiisorist.
