Korgõ ja madala massina
Ma kuuli raadiost, et pääliina inemise pelgäse massinamassu. A midä näil pelädä om, ku bussi ja trammi sõitva kõik aig edesi-tagasi. Eski piletit piä ei ostma, õnnõ rohilidsõ kaardiga vehkmä. Muidoki omma liinainemiisi massina egä aastaga suurõmbas lännü. Mõnõ liinainemise auto om joba nii korgõ, et varjas trammi ja bussigi är. Säändsele massinalõ tulõgi mass pääle panda. Midä korgõmb massin, tuud korõmb mass.
A maainemiisi käest võissi massinamassu võtta tuu perrä, kavvõh nä pääliinast eläse. Poolõ Eesti pääl olõs mass poolõ väikumb. Siin kagunukah piässi mass olõma jo miinusmärgiga. Tuu tähendäs, et riik mass viil pääle, et kiäki mua ja lumõga ka siin kandih eläs ja ümbre sõit.
