Sinnä ja tagasi?
Ma kuuli raadiost, et riik lätt inemiisist kõrrast kavvõmbalõ. Põlvah panti kinni mito riigiammõdi osakunda. As’apulga ütli, et tuu kandi inemise võiva bussiga Võrolõ sõita.
Säänestmuudu pandas ütskõrd terve Põlva maakund är Võro maakunna ala. Ja saagi tagasi üts vana suur Võromaa, nigu vanastõ oll’.
Parhilla lubatas, et Võro riigimaja vahtsõs tegemine või iks tulla. A tiiä-i kavvas tuud Võromaadki om? Või-olla viiäs perämädse inemise kah siistkandist är. Ildaaigu jo har’otõdi tuud är viimist ja 800 inemist olli üüse Mulgimaal. Ütlivä külh, et tuu om oppus. A või-olla nii har’otõdaski veeremaa tühäsviimist, nika ku inämb ei tuvvaki tagasi.
