Võro keele palvõkiri
Ma kuuli raadiost, et inemise saava ala kirota tugõmisõlõ, et lõunõeesti keele lääsi vahtsõhe keelesäädüsehe nigu piirkunnakeele. Et riik toessi säädüsega noidõ kiili, ka võro keele kaitsmist, pruukmist ja edendämist.
Säädüse omma hää, a egä võrokõnõ piät iks esi umma kiilt hoitma. Päälegi om viimätsel aol lännü muudu olla vasta kõgõlõ, midä riik vällä pakk. Või-olla olõs just hää, ku säädüsehe nuu punkti kirja ei saassi. Vai viil parõmb, ku uma keele kõnõlõminõ ülepää är keeletäs. Sõs õkva kiusu peräst tahassi pall’o võrokõsõ umma kiilt kõnõlda. Ku kuiki ei saa, sõs kuiki iks saa.
