Aktivisti talongõ vällä petmän

 
Vinne ao lõpun oll’ vahepääl sääne aig, ku võidõldi alkoholismi vasta ja kangõmbat kraami sai osta õnnõ sis, ku sul oll’ talong. Talongi pääl oll’ muu kraam kah, midä vähämb saia, näütüses tsukru. Ma olli tuul aol kõva moositegijä ja kompottõ kiitjä, nii et uma alkoholitalongi sai ma vaihta tsukrutalongõ vasta. A kõik tuu pääle es tulõ ja ku talong oll’ joba vällä ant, sis tull’ kangõmb kraam poodist vällä kah osta.

Nii läts’ avvustõt vana koolioppaja viinapuuti, talongi näpu otsan. A üten alkoholitalongõga oll’ tekkünü hulga joodikist aktiviste, kiä mõtli vällä egäsugumaidsi plaanõ, kuis talongi saia. Nii saisõgi poodi ussõ man üts miis, kiä ütel’, et timä om viinatalongõ kokkokoguja. Ütel’ oppajalõ, et andku uma talong timä kätte, tä sis kaes, et oppaja tuu kraami kätte saanu. Pallõl’ viil tsipa kavvõmbal uuta, et avvulinõ koolioppaja hindäle viinapoodi man saismisõga häpü es tennü.

Muiduki kattõ tuu miis kõgõ talongiga nigu tina tuhka. Ku koolioppaja tsipa ao peräst puuti uurma läts’, üteldi tälle säält, et poodin käü asi õks nii: kaup andas talongi vasta ja määndsitki talongikogujit vaihõl ei olõ. Arvada oll’ aktivist koolioppaja talongi kipõstõ vedelä kraami vasta vaihtanu ja tassakõistõ poodi mant minemä hiilnü.